Zwoa do kaust woi Trama

In Wirtshaus za da Lind'n do,
do sitz'n Zwoa banaund
und weus schau sovü trunga so,
so red'n's schau ollahaund.

Do frogt der Oa denn Aundern ,"Du!
Va wo bist den du he?"
Van Yschpatoi in Oit'nmoarkt,
i moa des kennst woih eh!"

In Oit'nmoarkt , a des is guat
i bi' jo a va do dahoam!"
Daun blost a jeda in sein Kruag,
das dauni spritzt da Foam.

"Jo, das i di denn goa net kenn?"
Faungt wieda Oana aun,
"Des glaub i schau, sogt oft da Oa,
I bi a Häuslmaunn.

"Geh' wos'd net sogst, a Häuslmaunn,
jo siagst, des bin i a,
hiatzt san ma oizwoa va oan Ort
a des is wirkli ra'r!"

"Wos host denn du oft fia a G'schäft?"
"I bin a Zimmermaunn!"________
"Jo gibts des? sogt da Oa, "das i
a grod des Haundwer' a hau'?

Na !" schreit a, "so wos, sitz'n hiatzt
zwoa Häuslmaunna, Zimmermauna,
und nu dazua zwoa Oit'nmoarkta
ba oan und denselbig'n Tisch beinauna!

Bist aum End nu goar dazua
a Feuerwehrmaun a ?"
Do faugt da Aund're s'locha au
wia waun ea narrisch wa.

Und schreit glei:" wos a Feu'rwermaunn,
schau boid hiatzt fuchzan Joahr!"
do schaut da Aundre deppat drei,
und moant: "I wa'r a Noa!

Jo sog ma, ruckst denn du net aus,
i hob di nu nia g'seh'gn?"
Da locht da Oa und Auntwort' drauf:
" Is a schau laung nix g'schehg'n!

Zweg'n an Feier oda Übung
bringt mi Koana aus'n Haus,
Hechst'ns bei an Gratisbier,
do ruck i sicha aus!"

Hans Pichler Hofedl