Waun boid Osta'n kimmt

'S Fruijoa' za uns ins Yschpatoi kimmt,
da Schnee schau va de Dacha' rinnt,
schei' laungsaum valia't da Winta d' Kroft,
es kimmt de Natua' schau a wen'g in Soft.

De Poimkatz'l wean schau oiweu' greßa,
d' G'fria geht auf, da Bod'n wiad oiweu nässa,
Hos'lstau'n staubt, se hot schau Poi'n,
und d' Natua schepft boid schau van voi'n.

Schneeglecka'l blia't schau zwisch'n de Schneerama'
und da Krokus tuat schau va da Sunn' trama.
De Wies'n wer'n schau laungsaum grealat daun,
oiweu' weniga wiad ea' Winta'brau'.

Es is' a hiatzt a schau boid d' Fost'nzeit,
und so maunches Kilo di' schau' g'reut,
hiatzt is' Zeit za da Umkea', es muass weg,
Entschlack'n hoaßt's, owa mit'n Winta'speck.

A wen'g bedochta' ess'n is' recht guat,
do wiad wida' dinna a dei' Bluat,
es kau' daun wida' rinna wia a' Bach'l
und dei' Miadigkeit valiast, bist nimma a miada Lackl.

Waunst du daun fia dei' Sö' a wos tuast,
des tuat da a daun recht guat,
lost di' richti' aus de Soarg'n foil'n,
des tuat da guat, 'in G'miat voa oil'n.

Denkst und g'niaßt Schöpfung und Natua',
daun host d' dei' Erholung pua'.
Mochst d' in da Sö' daun Fried'n,
kaus't wieda guat schloffa und kau'st ruahi lieg'n.

Hoi't du Fost'n und Gebet,
bist a za olle Leit' recht nett,
daun kau'st wiada a Ruah du find'n,
waun de Osterglock'n den Frieden kind'n!

Zusatzinfos

• G'fria = Gefrörnis, Bodenfrost
• Poi'n = Pollen
• Schneerama' = Reste von Schnee nach dem Ausapern
• grealat = grünlich

Quellen

Hans Pichler, Hofedl