Va da schen Leich

So hot's friaha g'hoas'n in da Weana Stodt,
waun's woa zan Sterb'n grod,
is' schau üwaroi Auskundschoft woa'n,
ob net irgend wo wea g'stoab'n.
Mia hot schau oiweu nochi g'frogt,
das des mit da schen Leich jo g'lobt,
mia hot schau vahaund'lt mit Kinda und Erb'n
weu es soi jo des scheinste Begräbnis werd'n.
Da Soarg daun aus Oachan' schau
und innen den schenst'n Üwatau',
A Poistal vorn ban Kopf,
das ma net so siacht den Kropf
und des schenste G'waund
so richt' ma den G'stoama daun zaum.
Sechs Kerz'nleichta in da Leich'nkaumma
und a hauffa Bleami werd'n g'naumma,
hot des ois' so hoibweg's passt,
daun hot ma oft schau um's Hobguat g'rafft.
Wia de Zeit'n daun schlechta san' woar'n,
do is ma mit da Leich' daun oft o'g'foan.
Kam woa den oarman' Racker sei Sö'l dahi',
de Leich'nfladera mit'n G'stoarma ,dea woa' nimma drin,
oft haum's n' durchs Fensta geb'n,
so is' mit da Leich a G'schäft g'west mit'n O'leb'n,
Aum Laund do is oft um d'Tuchat gaunga glei,
waun' a nimma oft woa' schei,
owa wichti woa, mia hot's g'hobt
oft woa des zweg'n da groß'n Not.
So woa des um de scheine Leich ,
des woa hoit friaha a gaunz a aund're Zeit.



friaha = früher
g'stoab'n = gestorben
g'lobt = gelobt
vahaund'lt = verhandelt
scheinste = schönste
Oachan' = Eichen
Üwatau' = Übertan -Leichentuch-Trauerware
G'waund = Kleidung
G'stoama = Toter Mensch
Kerz'nleichta = Leuchter
Bleami = Blumen
hoibweg's = etwa-ungefähr
Hobguat = Eigentum
woar'n = wird -werden
o'g'foan = abgefahren- abgenützt
g'west = gewesen
mit'n O'leb'n = mit dem Ableben
d'Tuchat = Bettdecke
 z'weg'n = wegen der

Hans Pichler Hofedel