S'Schwoaze Kammerl
Eine üble Lehrmethode!
Wos woa', waun a so a Schulabua',
dea' schlimm woa? Des woa' goa' net guat,
mia hot eahm mit 'n schwoa'z'n Kammerl 'droht,
do hot a jeda' g'hobt sei' schware Not.
Owa' so mauncha' hot des üwa'seg'n,
und ea' is' schau' in schwoa'z'n Kammerl g'we'n.
So mauncha' Lehrer woa' do schnö',
und ea' woa' schau' d'rin in Kammerl auf da Stö',
do hea'st 'n a' daun jammern und blea'n,
und host 'n daun a' g'heart reah'n.
Des schwoa'ze Kammerl woa' fia' den Rau'pfangkehrer,
in schliafboar'n Rau'pfaung zum Ruaß-Entferna'.
Fia' maunche Schula' woa' des a Lebensschreck,
und so maunche Leit' glaub'n, des woa' a guata' Zweck.
So mauncha hot a mordsdrum Aungst,
und waun 's finsta' wia'd, do wia'd eah' aungst und baung'.
So mauncha' Bua' woa' goa' net g'schreckt,
waun ea' öfta' in schwoa'z'n Kammerl is' g'steckt.
So hot eahm da' Lehrer amoi' va'gess'n,
do is' a' schau' aum Rau'pfaung ob'n g'sess'n
und hot owi g'schrian aum Moarkt, ea' hot se g'meld't.
Do hau'm s' eahm g'seg'n, und 'in Lehrer, den is' net recht guat g'scheg'n.
Wauns d' heit' a so a schwoa'z's Türl siagst,
wia schei' des is', waun' se koana' meah' davoa' fia'cht't!
Zusatzinfos
- schwoa'zes Kammerl = Kamine, die es in jeder Schule gab; der Rauchfangkehrer kletterte innen rauf und kratzte Schlacke und Ruß ab
- owa = aber
- üwa'seg'n = übersehen
- schnö' = schnell
- Stö' = Stelle
- Rau'pfang = Rauchfang
- schliafboar = schliefbar, durchkriechbar (von "schliefen" / "Schluf", vgl. Ohrenschliefer)
- siagst = siehst
- fia'cht't = fürchtet
Quellen
Hans Pichler, Hofedl
