Mi' g'freit hoit ois

Mi' g'freit hoit ois,
i kunt an jed'n foi'n um 'an Hoi's.
De Leit, de hob i' moads'drum gea'n,
kunt mit an jed'n glei' a Freind hoit wea'n.

Mia is a nix z' schlecht
und is' a boid ois recht,
nua wos i' hoit goa net mog,
des is' Foischheit - goa koa Frog.

Wü' mit mia oana streit'n, den geh' i' aus'n Weg,
weu' so wos mog i' net, des is' fia mi' a Schreck.
Do bi' i' vü' liawa alloa,
geh in d' Natua za de Stoa',
a mit de' kau ma red'n,
wo a jeda glaubt, de haum koa Leb'n.

Mia kau' se a guat obreagier'n,
nua wea foisch is, dea hot ba mia koa Hirn.
So kau' ma a mit jed'n Viechal red'n,
vü' glau'm 's net, owa es geht mit an jed'n.
Ob Henn', Sau, Kotz' oda Hund, se schaun de au'
und drah'n den Schäd'l, wia s' woi' sog'n mecht'n: "Nau"!

Owa geht da amoi a Oawat wo daneb'n,
daun is' a net 's hoiwe Leb'n,
a aundas moi geht 's dowit guat,
du braugst nua ruahi' Bluat.

Kau'st du mit dein' Partna' nu guat red'n,
daun bringst du a vü' mea z'weg'n,
du kau'st nu iwa jed'n Bledsinn freindli' locha,
kau'st sunst a iwa ois an Grinsa mocha,
und bist du a schau steif und boani',
daun bist du a nia gaunz alloani'.

Du kau'st di' üwa jed'n Groshoi'm g'frein.
Nau hiatzt sog ma', is' des net schei'?
Du braugst do a nia vazog'n,
do kau'st za dein Leb'n nua "Daunkschei!" sog'n!

Zusatzinfos

• mit de Stoa' red'n = Echosteine
• Viechal = Koseform für Haustiere
• Schäd'l = Kopf
• owa = aber
• Oawat = Arbeit
• 's hoiwe = das halbe
• dowit = doppelt
• vü' mea = viel mehr
• Grinsa = lachendes Gesicht

Quellen

Hans Pichler, Hofedl