Lostog

 
Heut' is' da' Sunnwendtog,
is' friaha' oana o'brennt, woa' 's daun a mords Plog',
mia hot daun des Hoi'z zan Bau' o'gschnitt'n,
dass des Ungeziefer van Hoi'z fort is blieb'n.
Bis aum ö'fi Vormittog muass 's sei' van Stock,
des woa' fia's Holz des beste aun dem Tog.
Ban erscht'n Liacht is' ma in Woi'd g'gaunga'
und hot ins O'schneid'n au'g'faunga'.
Des Hoi'z, des woa' hoi't g'recht
und is' net wurmig woa'n, nia schlecht,
a' is' a Braund-Hoiz g'west sodaun
und faungt ban Ofa' hiebei a' net zan brenna' au'.
Woa' Haus und Doch mit so an G'rechthoi'z g'mocht,
daun woa' noch an Braund des gaunze Hoi'zg'stöll nu do
und so 'wos hot ma a' net umreiß'n kinna',
weu' do woa' koa' Hoi'zwurm net drinna'.
Drum denk ma oi'weu' drau'
wos ma in an so an Lostog faungt ma au'!

Zusatzinfos

• Sunnwendtog = Johannistag (Johannes der Täufer), 24. Juni, astronomisch richtig findet die Sommersonnenwende am 20., 21. oder 22. Juni statt
• o'brennt = Haus abgebrannt
• mords Plog = Große Plage
• Bau' = hier: Wiederaufbau nach Brand
• Hoi'z = Holz
• ö'fi = elf (Uhr)
• Stock = Stamm
• o'schneid'n = abschneiden (mit Zugsäge)
• G'rechthoi'z = zur richtigen Zeit gefälltes Holz (hält ewig)
• Ofa' = Ofen
• Umreiß'n = Abreißen (hier: Gebäude)
• Lostog = Kalendertage, die Heiligen geweiht sind und eine Aussage über die Zukunft weissagen (losen)

Quellen

Hans Pichler, Hofedl