Holzknechtbua

Mit Sapl und Hockan,
mit gnoglte Schuah,
so gengan mia'r Hoizknecht
da Woidoawat zua.

An Rucksock a Bix'n,
mit Schmoitz und an Möh',
a Flasch'l mit Brauntwei'
des mocht oft d'Stimm hö'.

Waunst juhtzt, das hoi't
umadum in de Bam,
das S'Diand'l glei herad
waun grod oana kam.

Z'Mittog und auf d'Nocht wern
oft Schmoitz=nudl'n g'mocht,
do füll'n ma und d'Mog'n
bis das da Hosnream krocht.


S'Tobockpfeifal brennt
va da Friah bis auf Spot,
das' S'Mauncha sogoa ba
da Nocht in Mäu anu drin hot.

Und kimmt oft da Saumsta
wiad Fei'rau'nd g'mocht
do g'freit se an Niada
das s'Herz in Leib locht.

Da Oa geht zan Dirndl,
da aunda zan Wei',
oft hot hoit a'n Niada
sei lustig'n Vableib.

So geht's fost oi' Wocha,
Joa' ei und Joa' aus
da Woid is en Hoitzknecht
sei Hoamat ,sei Haus.

Waunn ma uns Woitan
a schind'n und plog'n,
so toama do oisaund,
des Los gern datrog'n.

Es kau jo nix schener's,
nix freidiga's geb'n
wia draust'n in Woid
so a sorg'nfrei's Leb'n.

Hans Pichler Hofedl

Aus Salzburger Nockerl von Otto Pflanzel
geb.27 Aug. 1865 in Urfahr