Heum'gei!
Waun da Summa' kimmt ins Yschpa'toi',
bloßfiaßi' geih' hoaßt 's üwaroi',
weu' Schuach hot ma' fia d' Kinda' kam g'hobt,
so hot ma s' daun, und net nua' g'sogt.
Ban Heig'na, do tuat 's in de Fiaß' weniga' weh,
owa' ba de Heu'm', do sticht 's jo dea't in d' Zeh'!
Hau'm s' mit oana' Sengst des Kernd'l g'maht,
oa Mau' hot mit da Sengst au'g'maht.
Auf 'n Sengst wa de Hos'lruat'n,
dass de Kornheu'm' schei' foi'n tuan.
Des woa' des Au'mah'n,
do woa'n daun zwoa Weiwaleut' daun drau',
de heb'n des Kernd'l auf
und leg'n 's aufs Strohband'l drauf.
Da nexte is' da Binda',
meist'ns hoi'b g'wochsne Kinda',
daun is' da Mandla' drau',
des is' a wengal a Ö'dana schau'.
Des hot se' daun a Sengst g'nennt,
so is' ba de Kloaheisla g'rennt.
Is' a Bau' daun greßa' g'west,
daun san' drei, vier Sengst'n g'west.
A' mit de Kinda faungt ma' schau' wos au',
de dan fleißi' Heu'm'glau'm tau',
de san' de gaunze Wocha bloßfiaßig g'rennt,
weu' an Schmerz hot ma' do kam g'kennt.
Und hot a Kind a' amoi' 'bliat't,
so hot ma 's 'trest't und hot g'sogt, dass 's eh wieda' wia'd.
So san' auf an so an Ocka' daun
Zeu'n um Zeu'n de Kornmand'l g'staund'n.
San' owa' so Heu'mblodan oda' Bletsch'n schwierad woa'n,
do is' ma' net glei' zan Dokta' g'foah'n.
A Wurza'pflosta' hot ma' oi'weu' g'hobt,
und nochhea' de Ring'lbleami'-Soi'm hot ma' a' recht g'lobt.
Den next'n Tog is' a jeda wieda' g'rennt,
an Kraunk'nstaund hot koana' g'kennt!
Zusatzinfos
- Heu'm' = Halme
- dea't = derart, so sehr
- Sengst = Sense, auch "eine Arbeitsgruppe mit einer Sense"
- Kernd'l = Roggen
- Bau' = Bauer
- Heu'm'glau'm = Roggenhalme zusammenklauben
- 'trest't = getröstet
- Heu'mblodan / -bletsch'n = Hautverletzung von den Halmen
- schwierad = entzündlich, schwärend (Wunde)
- Wurza'pflosta' = Salbe aus Fichtenharz, Bienenwachs und Spitzwegerich, Schweineschmalz, siehe Über das "Wurzer Pflaster"
- Ring'lbleami' = Ringelblümchen
- Soi'm = Salbe
Quellen
Hans Pichler, Hofedl
