Guat hot's a Vicherl
Waun i so nochdenk
und 's Grübl'n faung au'n,
do is's ma, i rennat
aum liabst'n davau'.
Davau in oan Saus,
bis i nimmer mehr mog,
weu i in Herz drin
a Wehload umtrog.
Ma rackert se, plogt se,
Joah'r ei' und Joah'r aus,
und muast di recht kümmern,
das D'enad kimmst draus.
Und is s'Joahr oft uma,
stehst grod auf den Fleck,
wiast host aung'faungt,
den stoanig'n Weg.
I hau schau oft g'sogt,
und i bleub a da bei,
a Viech hot's vü schena,
do wettat i glei.
Kam kau's a weng schnauf'n
auf dera liab'n Welt,
so hott's schau sei Fress'n
und kost eam koa Geld.
Denn s'Fuada, des wochst ea
aum Feld draust grod gnua,
Gwaund brauchans a koans,
un a koane Schuach.
Um d'Kinda,do schaun's a sö
a net vü' um,
's Schulgeh' und 's Lerna,
des is ea vü' z'dumm.
Se mochan en Vodan,
da Muada oll's no'ch,
Es braucht goa net laung,
stengans sölbstständig do'.
Und sans kam a Joah'r oi't,
is d'Jugend vabei,
do suacht se a niad's oft
zan Gernhaub'n a Wei'.
En Hau'n gehts aum bessan,
hot Weiwa grod gmua,
und is oani granti,
oft peckt a glei zua.
Dabei is a ledi,
kau toa wos a mog,
und hot mit'n Kin'an
sei Lebta' koa Plog.
Und schaust so a Öxerl au'
der hot's erscht guat,
der woas üwahaupt nix,
das Weiba geb'n tuat.
Betrochst a so an Bär'n, nau,
des taugad ma goa,
dea schloft ohne Kost
guat zwoa Viertljoahr,
Herrgott! des wa so
a Güatat, pick fei
schau destweg'n mecht i
glei a Bärn-Mandl sei.
Hiatzt follt ma geh' nu
so a kloa's Vichal ei,
en Schneck'n sei Leb'n wird
do a net dumm sei!
Dea braucht zu sein Häuserl
koan Grund net dazua
und hot va de Steuern und
Obgob'n a sei Ruah.
Ea braucht a koan Schlißl,
geht Hoam waunn a wü,
do köwet koa Weiberl,
is ollas mäuserlstü'.
Und mocht'n wos grannti
und wird a recht schia'r
do mocht a für' d'Haustür
a Koichwandl füa'r.
Jo s'gabad nu Häufti
de's schei haum und guat
das ma ea frei
a weng Neidi sei tuat.
Drum müas'ts mas vazeih'g'n,
waun i b'haupt so schnurgrod,
das's a Viech schena,
wia unsa'r oans hot!
Hans Pichler Hofedl Aus Salzburger Nockerl von Otto Pflanzl geb 27.Aug. 1865 Urfahr
