Geburtstag Geschenke

Bü'd'ln mit an bled'n Spruch,
a Soaf mit an' fua'chtboa'n G'ruch,
Glas'l fia' 'n Schnops, Wein und Bier,
de braugst in gaunz'n Leb'n nia.
Durchsichtige Heferl sand fia 'n Tee,
a Glos-Service fia' 'n Kaffee,
a Pressglos-Schiss'l in oval -
is' a Spende, fia 'n next'n Ball.
Tölla', g'stroaft in blau und brau',
de bring i' ba meina' Tant ban Sieb'zga' au' -
de siacht seit ihra' Kindheit schlecht
und g'freit se' driwa' sicha' recht.
A Blus'n, wia ma s' g'hobt hot, hochrot,
zwoa Stoa'guat-Schiss'ln fia' 'n Solot
und a murds drum Blumanvas'n,
a golda'ne Mokka-Kau'l mit de Tass'n.
Des Nochthemad, moa'st, kunnt 's toa',
owa' nua': es is' um zwoa Numma'n z' kloa';
a Puppa'l mit an Häk'l-Kload'l,
an schen' Pulli, nua z' laung, dea' is' van Koa'l.
Du entdeckst a Flosch'n Sekt,
des hot wea' g'wisst, dass der dia' schmeckt,
du g'freist di' momentan schau' drauf,
moa'g'n mogst d' 'n mit de aunda'n auf!
Hiatzt hoaßt 's aum Bod'n a Kist'n richt'n
und de Kraummuri 'eini schlicht'n,
aum ollameist'n wurmt 's in dia':
du host di' a' nu' bedankt dafia'!

Quellen

Hans Pichler, Hofedl