Dorfratschna

D'Seff,kadl und d'Wabi
Haum's heit wieda trawi,
Nötz ferti wean's frei.
Kinan eh schier net hatsch'n,
und do' miaßn's ratsch'n
und köweln dödrei.

Zauhnluckat is Kadl
und zweng um a Radl.
Hot d'Wawi, dö zweit';
Und de dritt' hot a Gwenat,
D'Seff stigatzt und denat
Rödt z'vül nu des Leit.

Nix tringans, nix essn's,
Auf's Kocha vagößn's
und auf d'Orbat dahoam.
"S'Koh'soi nua vabrina,
Wos schean uns de Kin'a,
sol se umschau nua d'Moahm!"

Ma hert's schau va da weid'n,
Wias wartl'n und streid'n,
Zan raffa sand's g'richt,
und wia's a so ratsch',
gibt oani a Watsch'n
da aundan in's Gsicht.

Na iatzt ohne Zweifö
is los erscht da Teufö,
und groß eahna Wuat.
Laung hot's ös nöt g'lid'n,
Zsaum haum sa se g'strid'n
und san wieda guat.

Und iatzt kimmt in d'Hachl
und kriagt oan's auf's Dachl
Dö holbatö Pfarr,
Dö Kloan und de Groß'n,
aun koa'n oanzög'n loß'n
Dö drei a guat's Hoa'r.

Do stengans beinaunda
und grein üba d'Mauna,
Dö san eah vül z'fäul,
und an irda beklogt sö;
Jo unsa oans plogt sö
und dö sauf'n dawäu'l.

Da Böcka, dea Zeld'n,
mia haum gmua vo den Held'n,
S Brot mocht a vül z'kloa.
Und da z'nichtigö Schneida
soll schau ,daß a weida
kimmt vo da Gmoa'.

Da Wirt is a Nossa,
is' Bier schütt a ' Wossa,
sovül anua kau';
Dea fluacht gaunz abscheulö
und nix is eam heilö,
nua da Sankt Florian.

Da Burgamoasta,
da Simand'l hoast a,
S'Wei loßt a regier'n.
Dö dalkatn Mauna,
Groß toa, jo des kaun' a
und d'Leut nur segier'n.

Und da neidigö Krauma,
na der muas se schauma,
an ird's kimmt zan Teul;
Üban Pfoara und Lehra,
dowißn's des mehra,
wia a Mühlrad'l geht's Mäul.

Daun geht's üba d'Weiba:
D'Moar-Lies wa dö Säuba,
Wauns hätt nöt an Kropf;
und d'Saminga Lena
Moant , sie is dö Schena,
Mit'n strohrot'n Schopf.

Vo dö Schulmoasta Kina,
dö Öldanö, d'Lina,
mecht laung schau an Maunn'.
Ös loßt sö nöt zwinga,
bei dö Amta tuats singa,
do kraht's wia da Hahn.

Von Wirt dö drei Techta,
mia mochan's nöt schlechta,
Oba dee haum an Kren,
Mit'n Jaga hot d'Susi
zwoa Joahr schau a G'spusi,
D'Leut rödn gar nöt schen.

So stengans beinaunda
vier Stund schau ban Graunda,
stad tasch'li da Brunn.
Und weida geht's ratsch'n,
bis endlö hoam hatsch'n,
waunn untergeht d'Sunn.

Köweln = Kritisieren
Stigatzt = Stottert
S'Koh = das Koch
Haum an Kren = Stolz
G'spusi = Liebesspiel

Gesammelt aus A lustigö Eicht und bearbeitet Hans Pichler Hofedl