Des Guate Wein=jahr

"Ja so süffi und fei
wia'r für an Prälat'n,"
sogt da Petrus zum Herrn,
"is da Wei' heia grot'n.

Schau owi zan Leit'n
wia grüawi als's sand,
des mecht i schon sehg'n,
wos de Kunt'n all's tand!"

"Nau, nau",moant da Herrgott,
da seel'nguade Maun,
"roas obi und schau do
den gaunze Hetz au'!"

"Jo bitt schön ! Gott Voda,
des tat mi schon g'frei,
i trink jo für's Leb'n gern
a guat's Tröpferl Wein!"

Oft roast a hoit furt und
bleubt hübsch a Zeit aus,
das in Gott Vodan
schau selb'n kimt da Graus.

Es wiad eam jo do nix
net zua'gstoß'n sei?
oda ea hot z'viel
dawischt va den Wei'n!"

Daweu a so roat, hört a,
das draus'd wer locht,
drum hot a glei s'Türl
von Himmel aufg'mocht.

D loant da guate Peterl
en Türpfost'n d'raun
und faungt oft glei wieda
zan pfugitz'n au'n.

"Ha!Ha!" sogt a, des war
a Gaudi do drunt,
da weu' is so guat,
das ma narrisch wer'n kunt.

Gmoant hon i, i kim eng
geh goa nimma hoam,
Vazeih' mas, Gott Voda!
So schmeckad a Oam!"

"Schau, schau," schmunz'lt da Herrgott,
"des wa ma nu recht,
hiatzt wa'r goar in Peterl
mei Hümmi schau z'schlecht!"

Do sog ma, wos red'n's denn,
wos sogn's denn zan Wei'n,
se wer'n ma dafia do
recht daunkboa wohl sei?"

"Mei liaba Gott Voda,
du do haun i g'schaut,
i hau' jo fost selb'n
mein Ohr'n goa net traut.

"Höll Teufel!" Haum's g'schrian,
is der Wein' ober guat!"
"Was?" schreit da Herrgott,
" Nau woarts nua, es Bruat!"

Auf's Jahr hobt's en Teufl
G'wiß nimma so gern
der Wei'n muas so sauer,
wia d'Holzäpfl wern!"

Und richti in Hirbst drauf,
wias Lab woa schau g'mal'n,
moant da Herrgott zan Peterl:
"Geh,tuama den G'fall'n.

Und schau a weng obi,
wos's hiatzt sog'n zan Wei'n,
der muaß jo so letz, daß
oam s'Mäul z'sammziagt, sei!"

Da Petrus pockt s'Kofferl
und roast hoit davau',
do laung hot's net dauert,
do klopft da schau aun.

Da Herrgott begrüaß't'n,
und frogt'n glei aus,
"Na", sogt da Peterl,
"Der Wei'n is a Graus!

Und schimpf'n toan's drüba,
wos außa nua kaun,
i bin drum glei wieda
G'schwind auf und davon!"

Do locht drauf da Herrgott,
das s'Bäucherl frei hupft
und das fost de Stern
und in Mau'nähl schupft.

"Nau," moant a zum Petrus
"Was sagn's hiatzt dazua,
haums nu mit'n "Teufl
und Höll ea Getua?"

" Ui jegerl! Gott Voda,
des sell ma schon recht,
hiazt schrein's: "Himmel! Herrgott!
der Wei'n is spottschlecht!"

Hans Pichler Hofedl

Aus Salzburger Nockerl Von Otto Pflanzl

geb.27.Aug.1865 Urfahr

</poem>