Da Auahahn

Da Förschta hot heit a Briafal kriagt
und fluach'n tuat a, so oft a's siacht,
A Fürst, so schreibt eahm so a Patron
Va da "hohen Forstdirektion",
wird kemma und will an Auahahn schiaßn'n,
Do soll oan's Leb'n daun net vadriaß'n!
G'schwind herbringa soll in Auahahn,
damit da Fürst daschiaß'n kaunn!
Va de hechst'n Herrschoft'n trifft eh koana',
und wer hot d'Schuld daunn? Unseroana'!
Und wia da Ferschta so damisch ment,
do kimmt sei Suh', da Hauns, a Student
auf Ferien is hiatzt dahoam da Bua
und ea redt' sein Vota'n güatli zua:
" Du muast de net so aufreg'n", rot ea,
"Loß mia de G'schicht nua üba', Vota.
Valoß de auf mi, sei net vadroß'n
A Auahauhn wird vom Fürst'n g'schoss'n!"
Da Förschta kennt sein Hauns'n guat,
Den grot's ollweil, waun der wos tuat.
An Tola' lost a springa glei,
auf daß guat ausgeht de Schiaßarei,

Um drei in da fruah aum nechst'n Tog
Schiaßt schau an Auahauhn im Schlog
Da Hauns trogt'n in Rucksock hoam,
daun ruaft a in Binda-Sepp in da G'hoam,
des is a Hoitzdiab, a oida Schnopsbruada
und sunst, na ja, aaudrat's Luada.
Z'hob'n is da Sepp, dumeiner Treu,
fia a Schnapsl zu jeda Gaunerei.
Und wos eahm auftrogt irzund da Haun's,
do is a ei'vastaund'n gaunz.
Mit'n Rucksock nimmt a in Auahau'
und mocht se gschwind damit davau'.
Da Fürst is wirkle boid d'rauf kuma
und hot quartier ban Första gnuma.
Um hoiwa oans schau in da Fruah
bringt'n da 'Hauns aus seiner Ruah
und Hoamli schleichans dahi in Woild,
Auf oamoi mocht da Hans'l hoit.
"Bst",sogt a "gema nimma vorau,
i her schau vada weit'n an Auahau" .
Da Sepp sitzt drob'n un boizt naum Bam,
so wundaschen boitzt a Auahau kam.
Vor Freid schia zidert da hohe Gost,
da Hans'l, der plotzt voa locha fost.
Do siacht da Fürst wos schwoarz do drob'n,
do hot ea sei G'wehr schau g'hob'n,
ea schiaßt, es schnoitzt, das damisch hoillt
und da Auahau g'schwind owi foillt!
"Der riaht se nimma, der is maustot",
so schreit da Fürst, vor Freid gaunz rot.-
Se brauchan net laung in Auerhau' z'suach'n
do liegt a schau ba da oilt'n Buach'n.
schnell buckt se da Haun's und mocht an Schroa:
" Du vasoffana Lump, du Es'l, du Noar!"
So schreit ea auffi zan Sepp gaunz wül'd,
der schaut recht bled und is gaunz düd
Im Rucksock drin, do hot ea in Hauh'n
aum Bam aubund'n, da guate Maunn.
Und wia , so haum's de zwoa ausg'mocht,
in Woid da blinde Schuß hot krocht,
do hot a daunn's Pack'l owi'gschmiß'n,-
Ön Fürst'n hätts boid vor Locha z'riß'n,
" So praktisch, wia da", so hot a g'sogt,
" Das a Hau'n, im Rucksock schei va'pockt,
am Bam ob'm sitzt, des findt ma seld'n,
des muas i glei da Frau Fürstin meld'n."
s is de G'schicht nu guat ausgaunga;
Da Hauns nua kau' se net dafaunga,
gaunz fuchti stöllt a en Sepp'n z'Red;
"Zwe host denn in Rucksock weggeb'n net?"
Da Sepp sogt:" Tuans ihna hab'n net lenga,
Ma kau hoit net aun ollas denga."

G'hoam = heimlich
düd = betäubt

aus A Lustige Eicht

Gesammelt Hans Pichler Hofedl