D'Müllisupp'n

Da Sepp'n Naz is
a soichtana Maun,
der hot van Wirtshaus nia
Hoamfind'n kaun.

Drum is a sei Alti
mit eam all'weu z'keut,
Sie wa sunst koa zwidas,
a recht a nett's Leit.

Do goa' nia an Maunn, der
Dahoam is a auf D'Nocht,
des hot's mit da Zeit oft
gaunz hirndamisch g'mocht.

So das in Natz woa
schiar selb'n z'dumm des Leb'n,
und recht gern an Aunloß
zan Guatwern hätt geb'n.

Er bleubt a auf D'Nocht oft
so laung nimma aus
und trocht mit an Ernst noch an Fried'n in Haus.

Sie tuat wohl z'weg'n den nix
dagleicha und mocht
koan "Maugatza", waun a
boid hoam kimmt auf D'Nocht.

A, denkt a se hoamli,
sie gibt schau nu n'och,
und is all' Tog oft
vor'n Schlof'ngeh'n do.

"Schau,schau," moat da Natzl,
"Hiatzt tuats ma schau schen",
weu a a Schüßl voi
Mülli siacht steh',.

Und sitzt se glei zuwi
zan Herd und ist's aus,
do nu mehr g'freits'n,
das Fried wiad in Haus.

Drum sogt a zan Weibal
in Schlofzimmer drinn,
"des g'freit mi, das d'oamoi
host g'endert dein Sinn!"

"Wos moanst?" frogt sie drauf,
"des woas i grod net heit,
und üwahaup't los mi geh',
i Vasteh's net, dei F'reid!"

"Geh' schau," sogt a, "siagst as,
wia glickli i bi',
das d'hast a Müchsupp'n
hergricht fia mi!"

"Wos?" schreit's a"Müchsupp'n,
du kimmst ma grod recht,
moanst de aum Herd,ha?
nau des wa net schlecht.

Do kunnt's oft schau sei,
das s'Geduldheferl bricht,
de hob i jo fia de
kloan Fad'ln herg'richt!"

Hans Pichler Hofedl Aus Salzburger Nockerl Otto Pflanzl geb. 27.Aug.1865 Urfahr