Ban Schindlmocha
Wia wiad a so a Schindl g'mocht,
des muas do' geh, des wa' do' g'locht.
Z'erscht muass ma' de Prigl schneid'n,
des muass mit da Ziagsog' sein.
Daun is' des Prig'l-Kloi'm,
dass auf Meisel schei' haundli' sei' soi'n.
De Meisel muasst d' entrind'n,
daun braugst d' de net so vü' schind'n.
'S Aufschlog'n kimmt hiatzt drau',
so wea'n s' de Schindl'n schau'.
Schind'l stroafa' mit 'n Roafmessa' hoasst glätt'n,
auf da Hoa'slbaunk geht 's aum best'n.
Weita' geht's auf da Nü-Goaß,
so geht's mit da Oawat in Kroas.
A Nuat des is de Nü,
mit den Messa brauchst a Zü.
O'richt'n mit da Rauhbaunk is a G'schicht,
so wia'd de Feda' ba de Schind'l g'richt.
Oedan woa auf da aundan Seit'n,
D' Schräg'n kennt ma schau' va' da' Weit'n.
Zan Schluss host d' an' Hauffa' Schoatt'n g'hobt,
owa' koana' hot do driwa g'klogt.
Weu' zan ei'hoaz'n, do woa'n s' guat,
und in Ofa' host d' boi'd g'hobt a Gluat!
Zusatzinfo
- Prig'l = Holzprügel
- kloi'm = klieben, spalten
- Meisel = Teil vom Holzprügel
- Roafmessa' = Reifmesser, Zugmesser, Zieheisen
- Hoa'slbaunk = Hoanzlbank, Schnitzbank
- Schindl nün = mit gebogenen Messer Nut schneiden
- Rauhbank = Langhobel
- Oedan = eine Seite der Schindel schräg hacken (Fase oder Spranz genannt)
Weiterführende Infos: Freilichtmuseum Elsarn, Schindelkatalog der Rapold GmbH & Co. KG
Quellen
Hans Pichler, Hofedl
