Hofna in Yschpa
Wiad ban Hofna da Loam boid goa,
do muas a um an Loam gei auf d'Hoad ,
ea trogt 'n mit da Put'n den Loam,
za seina Hofnarei noch Yschpa Hoam .
Natirli' hot a fest au'gfü't de Put'n in da Fria ,
weu ba a so an G'wicht geht a ba da Sunn' daun nia .
Waun owa vü Oawat woa hot a mit sein Knecht ,
das a so vü wia ea trog'n mecht .
Woa Ea daun Dahoam ,
hot ma richt'n meaß'n den Loam ,
mit Wossa hot man dina g'mocht
und fest trett das Boana haum krocht ,
mia hot'n mit an Seichal daun duachi g'sig'n ,
das koa Stoa'l oda sunst Wos woa mea' d'rin .
Waun da Töpfa hoakli' goa ,
hot a g'hobt de beste Irdane Woa' .
Oamoi in Joah' muas a noch Guat'nbrunn gaunga wean,
um an Quarz und va da Gloßhitt'n um a poa Gloßscheam ,
des haums zan Glassier'n braucht fia de Foab'n ,
das de Rain und Töof a daun bunta woan .
Waun ois paßt hot und ois woa g'richt ,
va'lost ea sei Töpferscheib'n an gaunz'n Tog fost nicht ,
do draht a olle meglich'n Sochan zaum,
wos so maunches Leit' daun oft braucha kaun .
Hefa fia Müch und Rahm
de draht a olle zaum,
greßane Hefa fia de Schweinane Fett'n
und wos se so maunche Bäurin au'gschoft hot do mog i' wett'n .
Weu des woa daun ollas gaunz kloa' ,
das so maunches Leit a domois schau fia a Zier daun woa' .
G'mocht hot a daun so maunche Obstschoin
und a sunst wos hot ea a nu g'foin ,
A auf de Kirtog is a mit sein Haundwag'l g'foan ,
do is a so maunche Schowamodl va'kaft woan ,
Wauns de au'peckte oite hot z'riss'n
de wos mit Bes'ndroht groalt woa muast wiss'n .
Mit dera is' oft vü Joah'n ,
da Gug'lhupf nu bocha woan .
Da Hofna hot g'hobt an Kirastaund ,
des is ois g'staunt'n auf da Stroß umanaund ,
das a jeda g'seg'n hot wos a do hot mocht
und das ma des daun nimma nimmt ,des mit'n Bes'ndroht !
Hofna = Hafner
Loam = Lehm
D'Hoad = Flurbezeichnung
Put'n = Zum Lehmtransport mit Tragegurt ausgestattet
Hoam = Zuhause
Fria = Frühe
Natirli = Natürlich
Oawat = Arbeit
Boana = die Füße
Seichal = Sieb
Wos = eine Sache oder Ding
Sochan = Dinge
Hoakli = Heikel
Hefa = Hefen aus Ton
g'foin = gefallen
Schowamodl = Gugelhupfform
