Erdbirn glaub'n

'Es woa za so oana Zeit
voa Ollerheilig'n do woas so weit;
do woa des Erdöpf'i grob'n ,
bis za Ollersöl'n de stad'n Tog'n .
Mit da Od'l hot mas ausg'ockat ,
do woas waun's drucka ,san's do g'leg'n aum Ock'a .
Zehn,zwö'f Leit aum Nochmittog haum glaubt daun nocha ,
in Streikeab und Zoanane Kowan is kemma des Socha ,
do woan a de Erdbanglaubarina a dabei ,
de a etla Roa'l ,oi Joa g'legt ban Bau'n haum ei' .
G'staund'n san daun a poa' Erdöpfiwog'n ,
mit de zaumg'roalt'n Mistlod'n .
Wias schau Gummiwog'n hot geb'n ,
do hostas a ois Loatawog'n ba de Erdöpfi g'seg'n.
In de Streikeab' hot ma de groß'n schein Erdöpfi tau'
und in de Kowan kemman de au'pletzt'n und kloan schau' .
Aum Wog'n hot ma de Streikeab auffi g'schitt in da Mitt'
und de Aunder'n hot ma in de Säck und de woan voan und hint.
Hint und vorau hot ma de Erdbansäck' hitau',
das de schein Erdöpfi san daun net davau'.
So hot ma g'mocht an gaunz an schein Fleck
waun's net drecki' woan woa boid a so a Ocka weg .
Es hot so maunche a da Schnee dawischt
und de Erdöpfi hot' daun Kö't'n zischt .
Mit da Latern' und Feistling' haum s do glaubt
und des Erdöpfi oawat'n hot daun um a drum länga' a daut .
In Kölla' san de Erdban mit da Erbanroi' kemma ,
auf an Stöll'n unta' da Erbanlucka do eina' .
In de Köllan woa daun kam a Plotz es woa ois voi'
mit Mostfass'ln ,Ruam und Öpfi so woas fost üwaroi' .
Des woa de Guate oite Zeit
wo nu z'fried'n woan de meist'n Leit!


Ollerheiligen = Allerheiligen
Erdbirn Erdöpf'i = Kartoffel
Ollersöl'n = Allerseelen
stad'n Tog'n = stille Tage
Od'l = Pflug zum Kartoffel ausackern
Ocka = Acker
Streikeab = Streukörbe aus Haselnussholz geflochten
Kowan = Kleingebinde dazu ebenfalls geflochten
Erdbanglaubarin = Kartoffel auflesen vom Acker
etla Roa'l = einige Zeilen Kartoffel
Mistlod'n = Mistwagen wurde auch zum Kartoffel Ernten verwendet
wias = als es
Loatawog'n = Aufbau am Gummiwagen Notlösung
Säck = Kartoffelsäcke
hitau = geschlichtet
davau = weggerollt
länga 'a daut = länger gedauert
Erbanroi = Kartoffelrutsche hat man beim Kellerfenster angebracht
Stölln = Absperrung nur für Kartoffel
woa ois voi = war alles voll
üwaroi = überall