Der alte Birnbaum

Vor launga Zeit, do hau'm s' mi' g'setzt,
i' moa, es is' 1835 g'west,
do hau'm s' a neich's Dorf g'mocht, Edla hoaßt des Nest.
"Diab'sheis'l" hau'm s' g'sogt, es san' ö'f Heis'l g'west.
Da Herr Pfoara Matthias Riederer, dea' woa' schau' g'stoa'm,
der hot va 1807-1834 fia' d' Obstbam in Yschpa'toi' fest g'woa'm.
Er hot va' seina' Hoamat Traunstoa' Obstbam' 'brocht
und hot aus 'n Yschpa'toi' a schene Geg'nd g'mocht.
In Rorregg, do is' a große Bamschui' g'west,
Birn' und Öpfibam', des woa' fia 's Yschpa'toi' a Fest.
D' Herrschoft, de hot se do vü' 'denkt
und hot den Leit'n a etla' Obstbam' g'schenkt.

I oi's Birnbam, ca. 5000 - woa do goa net alloa -
g'setzt hau'm s' uns ba de Heisa', ba de Weg, Stroß' und ba de Roa'.
G'oawat' hau'm s' do schau' mit vü' Hirn,
Koh', Wossa', Most, Rorregga' Hoi'z und Mostbirn'.
Da erschte Opfi' woa' da "Schwäbische Luikenopfi",
und vü' Soa'tn va' Öpfi' kemman do nu' nochi.
Wia zum Beuspü' Hoi'z- und Mostöpfi', de woa'n zan press'n,
und Jakobi, Grof'nstoana', Ros'n' und Ranedaöpfi', de woa'n zan ess'n.

Rundumadum do sa' ma g'staund'n noch da Reih',
oft a' rund ums Haus und Zeu' um Zeu'.
So sa' ma g'staundn Joah'hunda't' laung,
ums Leb'n woa' uns goa' net baung.
In Fruihjoah', do hau'm ma 'bliaht a's wia da wö',
de Procht is va'gaunga vü' zu schnö'.
A' da Wind, der hot uns goa' nix g'mocht,
do hot 's hechst'ns in de Wüpfi'n 'krocht.
De Wuaz'n, de woa'n broat und tiaf,
do hau'm ma vü Soft und Wossa kriagt.

An guat'n Schott'n hau'm ma g'mocht,
za'n Jausna', waun d' Sunn recht owa g'locht.
In Herbst hot 's a' an siaß'n Most zan trinka' geb'n,
und a gaunzes Joah' an guat'n Trunk zan Leb'n.
A' de zwoa Wö'tkriag hau'm ma üwa'daucht,
mia hau'm a' koa' Ess'nsmark'n 'braucht.

Nua' hiatzt de neiche Zeit, de bringt uns um unsa' Existenz,
's Lab, in Weg, de neiche Stroß, es wü' uns neam'd meah', mia kennt 's.
Mia steg'n zwoa nu' a wen'g'l z'saum',
in so maunch'n Goa't'n und Roa' steht nu' a Hochstaum.
Daweu' woa'n mia so schei' ba da' Blia' im Fruihjoah' aussi,
dass kam wos mithoi't'n kau', des mocht mi' trauri'.
Vielleicht dengan d' Leit nu' oamoi' z'ruck,
auf a schene Hoamat va' friaha', wo 's g'hoaß'n hot "HO RUCK"!

Zusatzinfos

• Edla = Hofedl
• Zeu = Zeile
• Wuaz'n = Wurzel
• Fruihjoah' = Frühling
• dengan = denken

Quelle

Hans Pichler, Hofedl