Yspertal

Des Yschpatoi', des is a scheine Geg'nd,
weu' 's so liablich do is g'leg'n.
Kimmst du va da Doana eina,
siagst d' as ban Pemperreitna schau' voa' deina.
Da Kiachatuam va Oi't'nmoarkt is grod voa' dia',
links daneb'n is Yschpa' mit da' Kia'cha oi's Zia'.
Drüwa' is' daun 's G'schloss Roregg,
ba an soi'chan Aunblick bist woih' gaunz weg,
bei an so an schen' Ausblick do
schoi't'st hoi't oa'foch oh.

Oa's liegt do auf da Seit'n,
des is St. Oswoid üwa' da Leit'n.
Do kau'st die Sööl' daun bameln loss'n,
weu' waun st' wüst, brauchst d' nimma' host'n.
G'niaß do herin' an jed'n Tog,
weu' 's ba uns jo so wenig Nöwi' hot.
Kimmst d' daun 'eina in d' Hoslau an Oat,
do wia'd des Toi' schei' weit und broat,
links kau'st weit auffi schau'n,
bis ins Lehof so daun.

Voa dia host daun de Broat'n
und rechts san Haisa', de auf eane' Leit' schau' woat'n.
Daun bist d' herin' in Oi't'nmoarkt im Oart,
aum Moarktplotz so maunches auf di' woart'.
De Kiacha' is gaunz stoi'z do g'leg'n,
do kau'st du bet'n um dein Seg'n,
weida' kimmst d' daun za unsara' G'moa',
do kau'st d' di' informier'n oda sunst wos toa'.
Voa' dia' Industrie- und Gewerbepark is g'leg'n,
wos doa't oi's gibt, muasst d' sö'wa' seg'n.

Links kimmst d' auf Yschpa' eini,
der Moarktplotz hot hoi't do des seini'.
Aum owa'n End steht Kia'cha, a' a Procht,
muast d' 'eini geih', a scheini Hoizschnitzerei prächti' g'mocht.
Yschpa' is' a' so schei' g'leg'n,
kau'st stik'lweis' Woi' und Grob'n nu seg'n.
Ban Friedhof voa'bei ba de Granitstoa',
kimmst za da Woi'dkapöll'n und Geierstoa',
do siagst d' daunn schei' umi za unsa'n Schloss,
es is' recht liab und goar net z' groß.
Da Wihoi'mteich liegt unt'n d'rinn,
weida' kimmst d' zan Woi'd und Burgschoch'nteich - des hot an Sinn.

Schaust d' noch Ost'n dua'ch de Wüpfi',
siags't d' in Pei'stoa', den hechst'n Berg do mit 'n Güpfi',
net recht weit, bist d' in Kaummaboch und Stangles do,
iwaroi' is' 's schei', des is' a so.
Noch Pisching is nimma recht weit,
nua' a gaunz a kua'ze Zeit.
De Kia'cha is 'in Hl. Urban g'weicht,
da Kia'chahümmi' schei' bemoi't, so siacht ma s' heit'.
Glei' außa'hoi'b van Oart
kimmst d' zan Saubach'l, a komisch' Woart,
do kau'st de Saubach'l-Höhl'n seg'n, [ca 300 m]
de längste Granitstoa'höhl'n, a Rarität, nau eb'n.

Weida geht's dua'ch Klaus zua da Yschpa'klaum do eina,
a Naturschauspül, sovül Wossafoi'l, a jeda' scheina'.
Bist du ob'n, daun kau'st weida' geih',
links da Königswoi'd, der hot des sei',
rechts viari kimmst du zan Ödteich-Daumm,
doart rechts faungt daun da Druid'nweg aun.
Noch an Rand'l geih' siachst oi's erschtas schei' ins Yschpa'toi',
do siagst d' a' aundare B'sundaheit'n auf jed'n Foi'.
Da Steig is do ziemli' leicht,
so kimmst d' za da Kaisa'-Reith,
und a Stikl 'auffi, goa' net recht weit wegga,
kau'st Phallus und Vulva du entdecka. [letzte Sakrale Bewegungen 450 n Chr.]

Do siagst d' rechts de Sauriass'lmau' in Woi'd,
de Kopfwehschoi'n, in Echostoa' wo's so schei' hoit,
sitzad Hund und stehad' Schoi'n aum außan Stoa'kroas,
da Druid'n-Treffpunkt, den schau' a jeda woaß,
da Sphinx, aufs Bönd'l geht 's daun weida',
vül Schoi'n sand, a poar vawochs'n, najo leida',
zan Güpfi'kreiz do geht's bergo',
aufpass'n muast d', do rennan da d' Stoa' glei' no'h.
Do kau'st d' de' amoi' nieda' hucka'
und de gaunze Geg'nd au'gucka',
in Peilstoa' host d' mächti' do voa' dia',
Pisching is voa' deine Knia.
Rechts is des Stoa'fensta' g'legn,
schaust d' dua'chi, kau'st in Echostoa' seg'n.
De guat'n Erdlinien kau'st do erauhnen,
üwa so maunch' Echo kau'st nua staunen.

So hot ma friaha schau Bam, Wossa' und Stoa' g'seg'n,
a guate Soch fia' Leib und Sööl' is g'wes'n,
a jed's Breckal Natuar, wos d' do siachst,
is' so schei', do wea'n da d' Aug'n do liacht.
Siagst va herob'n do unsa Toi',
bist valiabt auf jed'n Foi'.
A jeda', der amoi' do woa und des g'segn,
den is unsa Toi' im Herz'n g'leg'n,
owa hot 's oana a' oft nu' so euli',
er kimmt wieda' z'ruck, nau freuli'!

Zusatzinfos

• Doana = Donau
• oh = ab
• Sööl' = Seele
• g'niaß = genieß
• Nöwi' = Nebel
• Oa't = Stück
• Broat'n = Breiten Flurname
• G'moa' = Gemeinde
• seg'n = sehen
• Woi' und Grob'n = Wall und Graben
• Woi'dkapöll'n = Waldkapelle
• Böndl = kleiner (Tal-f) Boden
• Geierstoa' = Geierstein
• Pei'stoa' = Peilstein
• iwaroi' = überall

Quellen

Original Hans Pichler, Hofedl