Wie das Klafterscheit nach Wien kommt
G'wochs'n sa ma zwisch'n Bärnkopf und Guat'nbrunn,
vü Bam' san g'staunt'n in Schott'n owa a in da Sunn,
da Fea'schta suacht uns aus do grod,
wöcha's Hoiz kimmt do in d' Weanastodt.
Dreihundat Hoizhocka' hot's do geb'n,
va da Yschpa'klaum bis za da Wurzeb'n.
Fia' 45.000 Klofta Hoi'z im Joa',
do wiad schau a schei's Eck Woid goa
und vü va de Hoizhocka oawat'n a gaunze Wocha,
haus'n in de Woi'dhitt'n unta da Lohrind'n und tan Sterz kocha.
Woa a moi a Breck'l G'söcht's dabei ban Ess'n,
des woa füa de Hoizhocka' net oiweu, owa aum best'n.
Da Werkzeig in Hoizschlog a Ziagsog', Hocka, Schoana und a Keu',
Zoi'stob, Schrenkzeig, Feia'zeig, Sterz'rei' und a poa Feu'.
Mia hot daun Wochanlaung g'heat: B A M foit
und schneidn und Treibn in gaun'z'n Woid.
Aufg'schnitt'n san de Buchan daun,
ois Klofta auf dreivirt'l Meta laung.
Ban klia'm waun 's guat gaunga is des Hoiz',
do hot's ban ausanaunda klia'm schei g'schnoitzt.
Wia daun de Klofta' aufzoat woan',
hot mas g'richt mit'n Ziagschlitt'n zan weggafoa'n.
In nextn Winta woas daun so weit,
weu do woa fia' de Schwemmerei a Zeit.
Mia hot de Kloftascheit'l zan Schwemmboch zuwi g'richt,
das ma s' daun im Frui'joa' schei dawischt'.
Ba da Schneeschmö'z woa daun a Großaufgebot,
wo ma üwa 300 Leita au'g'stö't hot,
so woa ma g'richt fias Scheita schwemma,
des ma Trifft tuat nenna.
Ois erschtas is des Ziag'n van Öd'n Teich,
des mochan a poa Hoizhocka leicht
und des ausschlog'n va de Kloftazoa,
des muas jo a glei' wea toa.
Es mias'n de Scheita schei schwimma',
do wean schau Leit' dabei sei', de miassen wos kina,
weu waun se' de Kloftascheita spiss'n toa'n,
do hängt a hauffa Oawat und a a Kina' drau'.
Es woa da Fei'hog'n des wichtigste Gerät,
dass bis zan Recha in Yschpadorf wos weida geh't.
Waun's guat g'rennt is in fünf, sechs Stund,
woan de Scheita in Yschpadorf drunt.
San vü Scheitta henga blüm, hot ma nochi putzt
und hot des Wossa va de Klaus'n g'nutzt.
In Yschpadorf woa hiatzt Hochbetrieb ban Schlicht'n
und ban 45.000 Kloftascheita' richt'n.
Daun geht's dahi' mit'n Hoiz in d'Weana'stodt,
mit de Schiff und mit de Flöss wias hoit is grod'.
So kimt des vüle Hoiz daun au' au'm Haund'lskai,
und da Haundla schreit "des Hoiz' kau' nua van Weinsberg sei"!
Zusatzinfo
- Yschpa'klaum = Ysperklamm
- Wurzeb'n = Revier
- Klofta = Klafter (Längenmaß = 6 Fuß - in Ö: 1,9m, Holzmaß als Holzstoß von 1 Klafter Länge, 1 Klafter Höhe und 1 Elle Scheitlänge - also ca. 3 Festmeter)
- Hoiz = Holz
- Lohrind'n = im Saft mit Schäleisen geschälte Tannen u. Fichtenrinde
- Schoana = Scharten
- Feu = Feile
- Zoa = Holzstoss
- spiss'n = verkeilen
- kina = können
- Fei'hog'n = Feuerhacken
Lesenswerter Artikel über eine Waldbahn im Ötscher-Dürrenstein-Gebiet, über die mit Pferden Brennholz aus dem Rothwald zur Ybbs gezogen wurde, um es nach Wien zu triften: Rothwaldbahn
Quellen
Hans Pichler, Hofedl
