Was Häns'chen nicht lernt !

Was Hänschen nicht lernt, lernt Hans nimmer mehr,
so hoaßt a Sprichwoa't, und so geht 's a' her.
Oi's kloana Bua': "Schau", sogt mei' Papa za mia:
"Kau'st ma wos hö'fa', i zoag' da' 's a' wia':
du kau'st Hoi'm' klau'm, des kau'st schau' mocha',
klaubst d' as z'saum', 's Koarn do van Ocka'!"

So is' 's da' 'gaunga' oi's kloana Bua, waun 's di' a' net g'freit,
owa' es hoaßt oi'weu': "host jo eh Zeit".
Oda' des Kinda'-Stül'n woa' a' so a G'frett:
braugst net oa'wat'n, owa guat is a' net.
Daunn im Fruihjoah' aum Ocka' des Meih'n,
mia nimmt 's ba'n Zaum und hoi't 's daun ei'.

Oda ban Ei'liadan 's Gros a wen'g z'saum'recha',
kau' a jed's kloa's Kind jo a' schau' mocha'.
Es hoaßt oi'weu': Hansi, des kau'st d' eh,
tuast d' a wen'g nochrecha' do ban Klee.
Aufhüfi'n kau'st a' a wen'g hö'fa',
de unta'n Spriss'ln wia'st d' schau' da'glenga' mecha'.

Ban' Z'ruckgeih' kau'st d' as glei' richt'n,
klaubst d' Kleehoi'm' z'saum', des woa'n hoi't so G'schicht'n.
Woa' daun aufg'hängt und trucka' da' Klee auf de Hüfi'n,
Hansl zeitli' in da Friah' a wen'g fost'n, moa'g'n is' lifti'.
So woa' 's a' ban Erdöpfi' klau'm: Du bist jo nu' kloa',
kau'st de' leicht bucka', bist niada', woaßt eh, wia i' moa'.
  
Wia i' gressa' woa', hoaßt 's: des kau'st schau' boi'd richt'n,
Traktoa' foah'n, des woa'n schau' schenane G'schicht'n
oi's Goa'm bind'n und dabei Hoi'm' o'klau'm,
owa' zan Schluss mocht ma a' nu' d' Mand'l z'saum'.
Mand'l mocha', des woa des nexti G'schäft,
ban Woaz' und 'Troad woa' g'rod des recht.

A so is' de gaunze Ferienzeit ausg'füllt g'wes'n,
zan spü'n hau'm ma net vü' Zeit g'hobt und nu' weniga' zan les'n.
Woa' owa' a Oa'wat fea'ti' und uns hau'm s' domoi's g'lobt,
des woa' fia' uns a so, wia ma hiatzt sogt: "Dea' is' 'dopt"!

Zusatzinfos

• Hoi'm' = Getreidehalme (wurden mit der Hand gesammelt)
• 's Koarn = Roggen
• Ocka' = Acker
• Kinda'-Stül'n = Kinder-Stillen
• Meih'n = Pferde führen am Halfter
• Ei'liadan = Grünfutter machen
• Aufhüfi'n = Klee auf Hiefel (so sieht das aus) oder Leitern oder Häuseln aufhängen
• Spriss'ln = Querstangeln an den Pfählen
• Goam' = Garben
• Mand'l = Roggen- und Weizengarben, zum Trocknen zusammengestellt

Quellen

Original Hans Pichler, Hofedl