Unsa Glock'n mocht nua mehr Bim
Va' da Weit'n hearst da 's jo net so guat,
wia des G'leit' in Moarkt so tuat.
Host wos z' toan ba da' Kircha d'rin,
ban Leit'n sogt de große Glock'n bim-bam, bim-bim.
Do muasst auffi aum Turm, do is' wos los,
weu' sunst mocht da Klach'l hoi't daun irgendwos.
Is wuascht, gehst d' zu zweit oda' aloane,
do hängt a' schief, da Klach'l, auf de Seit'n oane.
Hiatzt muass daun ollas schnö' geih',
's G'leit' o'g'stöllt, des muass so sei'.
Schnöll zan Lindna' Koarl mit da Bitt',
hü'f uns, ba uns, do geht de große Glock'n nit.
Er roast holt wieda' amoi' mit sein Zeig
va' eahm za da Kircha hi', do is' jo net weit.
Oba in 'n Turm auffi, do is' hoch und laung,
do wia'd ma ban erscht'n Moi' auffigeh' schau' baung.
Unsa' Norbert meistens is' do a' dabei,
denn da' Klach'l hot mit de Feda'n 50 Kilo eh a' glei'.
Den hot da Koarl auf sein Bug'l,
der Klach'l, a mords Trumm schwara Mug'l.
In seina' Werkstott schwoaßt er und mocht,
und haumma't er, dass oi's krocht.
Schofft a' au', wos er oi's braucht, und mia hau'm 's brocht,
und ea' hot 'n daun glei' ferti' g'mocht.
Noch an Rand'l siagst 'n wieda' geih',
in Koarl mit 'n Klach'l, oi's wa' 's da sei'.
Owa' ban next'n Leit'n kau'st da 's schau' hear'n:
do hoaßt 's net: "es wia'd schau' wer'n".
Es hoaßt nua': "es is schau' wieda g'mocht",
wauns d' 'n frogst, wos 's kost', sogt a' "passt schau'!" und locht.
Ban Gebetleit'n heast da 's wieda' schei' -
a schena' Gruaß obi za unsan Kunstschmied, so soll 's sei'!
A "Vergölt 's Gott" fia' d' Orbeit auf da Stöll',
i' glaub de große Glock'n leit't oi's Daunk gaunz höll.
Erfoahr'n tuat do meist'ns neam'd vü' davau' -
es is' hoi't gaunz oa'foch 'tau'!
Zusatzinfos
- Klach'l = Klöppel, Glockenschwingel
- Rand'l = Weile, kurzer Zeitraum
Quellen
Hans Pichler, Hofedl