Silvesterkrocha

Za Silvesta', do geht 's oi'weu' rund,
do hot koa' Rua'h koa' Viech, koa' Hund.
Ban Tog geht de Schiaßarei schau' au',
auf a bestimmte Zeit, do hoi't se' koana' drau'.
Wea' denkt do aun 'an Feinstaub,
da nexte reah't, ea' wia'd va' dera Schiaßarei gaunz taub.
De aunda'n mochan se' schau' Sorg'n,
dass z' wen'g Raket'n hau'm dahoam.
A jeda' reah't schau' boi'd,
weg'n den CO2 in da Luft Gehoi't.
Ba de Kiah', do hot ma Angst,
wos d' da Kuah' nu' fuata'n kannst.
In da' Rauhnocht auf de Viecha do denkt koana',
owa des Raket'ng'schäft is' hi', do hea'st da s' woana'.
Dass ma owa' va' de Viecha leb'n kinnan,
auf des wü' se' koana' meah' erinna'n.
Dass owa' vü' huascht'n, krachaz'n und schnau'n,
do schaust d' da' amoi' de dick'n Luftschwod'n aun.
Boi 's um di' krocht und stinkt
und de guate Luft daun nimmt.
Koana' hot wos va' de' Lärm,
owa' jammern tuan s', dass schlecht hear'n.
Üwaroi' muasst a Mask'n trogn,
ban Schiaß'n, do tuat koana' klog'n.
Waun 's rundumadum daun krocht
und hö' is' de hoi'wat' Nocht,
und do jamma't boi'd a jeda' wos z'saum',
dass ma koa' Gö'd meah' üwa' hau'm.
Se' foah'n um de Raket'n in d' Tschechei',
weu' ba uns san' de jo vü' z' tei',
mia berechn't jo do' kam,
dass ma CO2-reich san'.
Friaha' hot ma g'schoss'n a dutza'd Schuss,
mit 'n Terzerol, und daun woa' Schluss.
Des woa' friaha' de guate oi'te Zeit,
wo ma se' um a Kriagl Most und a Schmoi'zbrot hot g'freit!

Quellen

Hans Pichler, Hofedl