Seklstricka

Aus Landschaftsgeschichten
Zur Navigation springen Zur Suche springen

G'schichtl

Friaha woa ma froh,
dass a Schofwoi woa in jedn Haus do,
mit da Schofwoi koite Fiaß',
des gibt 's do fost goa nia,
und woan de Seckl oamoi zach und feicht,
trickan iwa d' Nocht - des woa gaunz leicht.
Wia is ma za an Schofwoisockn kemma?
Mia muass a so a Streidl Schofwoi hernema.
Oana is gsessn auf an Schaumi oda Baunk,
d' Händ voa dia wos des Streil is laung,
und da Zweite hot gwicklt den Woikneun zaum,
dass zan Stricka daun des Kneul schei renna kaun.
Ban Stricka in an Häfa drinn,
so geht 's leichta fia de Strickerin,
mit fünf Stricknodln faungts daun au,
des Stiezl is ois erschtas drau.
Augschlogn zwoa glott, zwoa vakeat,
wia 's fia a Stiezl oiweu hot g'heat,
des woa, dass da Sockn schei g'hoitn hot daun,
waun ma ba de Sockn ziagt aun.
Mia hot dan glott weida g'strickt,
weu mit da Ferschn woa 's aa so a G'schicht:
des hot oane kinna miasn,
weu sunst hot 's gwetzt aum Fiassn.
Glott woa de Strickerei, das net drucka tuat,
denn des tuat in Fiassnan dowit guat.
Ban Voafuaß hot ma ognumma daun,
des woa de Secklspitzn draun,
mit oana Stopnodl zaumzaht und vanaht
und in letztn Fodn daun eiwendi eini zaht.
Woa owa a so a Sockn oit und schieda,
gstopft hot man oiweu wieda.
G'strickt is friaha üwaroi woan,
ban Hoamsuacha, ban Redn und Singa dahoam,
do is' nia Zeitlaung g'west den Leitn,
es nu net gebn des Fernsehn unsera Zeitn.
Mia hot ois gwisst varanaund,
und gebn hot ma se oiweu de Haund,
des woa a Stickl va da oitn Zeit,
de woa sicha gmiatlicha und a Stressfreiheit!

Zusatzinfos

  • Seklstricka = Sockenstricken
  • Schofwoi = Schafwolle
  • zach = leicht feucht
  • Streidl = Einheit für Wolle und Flachs zwischen Ellbogen und Handfläche
  • Woikneul = Wollknäuel
  • Stiezl = Bündchen am Abschluss von Socken oder auch Pulloverärmeln
  • Ferschn = Ferse
  • oana = ein Mensch, eine Person
  • Voafuaß = Vorfuß
  • Stopnodl = Stoppnadel - dicke Nadel zum Stoppen von Wollsachen
  • schieda = schütter (durchgewetzt dünn)

Quellen

Hans Pichler, Hofedl