Reibbrett

Adventzeit wias friaha woa überoi'
in de Berg und a im Toi',
ma kehrt und putzt ois schei zaum
das mas za de Feita recht schei haum.
Mit'n Reibbrett is do zaumg'wischt woa'n
do is ma mit'n Fetz' und Reibbirscht'n g'foahrn,
van Dochbod'n bis za da Köllatia',
vagess'n hot ma do koane Wink'l nia'.
A jed's Zimma', d'Speis und d'Stub'n,
a jede Baunck ,Sess'ln und de Tisch draht ma um.
De Herrgottswink'l putzt ma schei,
das net wo a Spinerhaut hibei kau sei .
A de Heiligenbüda wea'n do g'wosch'n,
Herz Jesu,Herz Maria und s'Krippal mit Es'l und Ochs'n.
Mia hot a so maunch'n Streit daun g'schlicht
das ma a im Herz'n fia Weihnacht'n woa g'richt .