Prannleit'n

Aus Landschaftsgeschichten
Zur Navigation springen Zur Suche springen

Es liegt im Yspertal a Bauernhof, die Prannleit'n ,
waunst va Persenbeug kimmst, siachst da s' va da Weit'n.
Ei'bett' is a in a Muld'n, es foit net auf,
kimmst d' va ob'n, host d' rechts in Woid und 's Bach'l mit sein' Lauf.

Ehrwürdi' steht 's do, des Bauernhaus,
1450 woa 's schau in Matrik'nbiachl in Oswoid, lest ma d'raus.
De Außenmau'an, de san aus Stoa',
an Meta' dick, es wisst's schau, wia i moa'.

Do braucht koa Isolierung sei',
in Winta und in Summa do is fei'.
De Prannleit'n woa aum Au'faung gaunz kloa,
a schwoaze Kuch'l, a Kaumma und d' Stub'n alloa.

In da Stub'n, do gibt 's auf da Deck'n an Trumm Kroas,
in da Mitt' des J-H-S, wos ma söt'n mea woaß.
De Sö'nlucke is zwisch'n de Stu'mfensta in da Heh',
waun wea aussig'stoam is, hot ma aussi loss'n de oame Sö'.

Auf'n Bod'n drom, do woa da Kitting a guate Stö',
Fleisch, Brot und a des Möh', des hoit do eh,
des hoit do laung und guat,
weu 's jo nu koa Küh'trucha geb'n tuat.

In Hof woa friaha da Misthaufa mit de Hea',
hiatzt is a Ros'n und damit is grea'.
Auf da owan Seit'n, do woa da Stoi' fia d' Roß' und Kia',
und voan Stoi' da Graund, dea woa trucka nia.

Da Stod'l woa daun drau
und daun des Schweinane nau', nau'!
Auf da Hitt'n woa da Körnabod'n
owa da Wog'nhitt'n oh'm.

Des Bockheis'l is üwan Weg dane'm,
mia kau des va auss'n nu oiweu daseg'n.
Do hot ma friaha g'söcht und Brot bocha
und Zwetschk'n dea't und va Birn tan s' Kletz'n mocha.

Hiatzt is a wenig aundascht woa'n,
a Heizung mocht olle drei Heisa' woam.
Wia d' Leit woan mea,
do muass a zweit's Haus daun hea'.

In da Bei'hitt'n woan de meist'n Viecha,
waun 's recht schwü' woa, woans oft schau' z'wida.
De Imka va da Prannleit'n de san g'stoam,
und a Laufstoi' is do hea baut woan.

Um 1450 hot ois za St. Oswoid g'heat,
und aus da Wiag'n haum in Peckstoana seine Kina g'reat.
Voa 300 Joahr'n hots schau Pichla g'hoas'n,
van Büchla, Bühla, Bigla bis zan Pichler, des kau' roatz'n.

Seit 1955 do hoaßt 's in da Prannleit'n Schroll.
Vü' Oawat und ocht Kinda, de mochan d' Stub'n daun voll,
Do is' de Hoamat hoit schau' schei',
waun ma do gebor'n kau' sei'.

Mia san daunkboa 'in Herrgott do,
waunst heakimmst, do bist woi' froh.
Mia wünsch'n den Besitzern Gottes Segen,
de Prannleit'n soi hoch leben!

Zusatzinfo

Die Prannleit'n wurde im Jahre 1450 unter Prandlüthen in den Pfarrmatriken von St. Oswald unter einem ganzen Zehent angeführt.

  • J-H-S bzw. I-H-S bzw. IHS = Jesus in griechischen Buchstaben (genaugenommen ΙΗΣ)
  • Sö'nlucka = Seelenloch
  • Kitting = ein Raum mit ungebrannten Lehmziegel ummantelt [gekittet], siehe auch Kittingboden und In Kitting Drom
  • Hea' = Hühner
  • Graund = Grand (aus Granit gehauener großer Trog)
  • Bei'hitt'n = Bienenhaus

Quellen

Hans Pichler, Hofedl