Powid'l

Warum hot's friaha an Powid'l geb'n,
laung hot a' g'heat zan üwaleb'n .
Zwetschck'n hot's voa Bia'n und Öpfi' g'seg'n
und oft haum's g'heart zan üwaleb'n.
Hot ma de Zwetschck'n g'wosch'n und entkernt,
des hot ma den kloan Kindan jo schau g'lernt.
Voa' ca. hundat Joah'n hots ka'm an Zuck'a geb'n
und so hot ma ba da Fost'nspeis nua Powid'l g'seg'n .
Zan Powid'l hot ma a g'wisse Zeit daun braucht dafia
wia ma den kocht hot braucht ma a launge Zeit dafia.
In an groß'n Hefa mit an biss'l Wossa kocht,
a hoiwi Stund mit de Zwetschck'n des hot's brocht,
daun a via fünf Stund aum Ofaraund daun ziagn
net hoas und hi' und do a biss'l rian,
owa ollas ohne Zucka hot ma ei'kocht
und hot a wos Siass fia de oama Leit g'hobt.
Powid'l hot ma' fia ollas g'numma,
so is' ma kemma bis zan next'n Summa,
fia de Strudl'n, Palatschinke'n, Wuchtl'n und Bäckerei
und a de Powid'ltascherl woan a do oft dabei!