Oiswosnimmagibt

Wos hot 's ollas friaha' geb'n
in unsa'n jugendlich'n Leb'n?
Wia soi't denn des friaha' sei':
ollas muass ma mit zwoa Fiaß' geih'.
Ei'kaffa', des woa' a so a G'schicht:
des hot 's in an Sunda' noch da Kia'cha' g'richt.
Zan Kia'chageh', do hot a jeda Zeit
und hot a' an jed'n g'freit.
Es hot koane Plastiksack'l geb'n,
host nua' a Stoffsackl a gaunz's Leb'n.
Koa' Telefon woa' friaha' do,
in an Sunda' noch da Kia'cha', do red't ma se' o'.
Ollas hot ma in da Haund oda' Rucksock hoam'trog'n,
de wenigst'n hau'm a Auta oda' sunst an Wog'n.
Mit'n Rennwag'l san' de bessa'n Leit' nua' g'foah'n,
und de hau'm eah'n Staund meass'n zoag'n.
Weit foa't is' kam wea' g'kemma',
mia hot se' kam a Zeit kina' nehmma'.
Urlaub und Roas'n hot 's net g'geb'n,
nua' Woi'fahrt'n hot ma de Leit g'seg'n.
Hot oana' a'moi' a Werkzeig 'braucht,
do host d' aum Kir'a' do a' g'schaut.
Host a'moi' van Schuasta' oda' van Schneida' wos woi'n,
do host a Weu' üwa'legt, ob 's da 's leist'n kau'st ban Zoih'n.
Zan Wosch'n hot ma g'hobt an hü'zan' Trog oda' Wand'l,
weu' ban Bod'n hot 's schau' dau't a Rand'l,
bis dass olle noch da Reih'
in sö'b'n Wossa' wieda' woa'n schei'.
A Soaf', de hot ma mit da' Da'mfett'n g'mocht,
noch 'n Sau-O'stecha' auf an schiach'n Tog.

A elektrisch' Liacht hot 's sö't'n geb'n,
mit da' Petroleumlaump'n host d' miass'n seg'n.
Friaha' host d' oft wos in ocht Tog g'mocht,
de aunda'n hau'm 's in oana' Wocha' net z'saum'brocht.
De' Wocha'tog hot ma a wen'g aundascht g'nennt,
so hot ma in Ear'a' und in Pfingsta' g'kennt.
Pfingsta' is da fünfte Tog in da Wocha
und kimmt Pfingst'n 50 Tog va Osta'n nocha.
Es woa' oi' Joah' in da Summa'zeit noch 'n Kornschnei'n,
do muass des Hoadheigna a' do grod sein,
de Mohda geingan schau' um zwoa mit da' Sengst aum Buck'l
auf de Hoad'n mit de stoana'n Mugl.
Guat zan Mah'n woa 's, waun 's nu' feicht van Tau,
do kimmt da' Birschtling ban Sengstmah' drau'.
So hau'm s' an etla' Joch daun g'maht,
bis dass de Weiwa'leit' mit da Stosupp'n au'draht,
do hau'm de Mohda an Juchaza dau',
und fangan in's Stosupp'n schlaump'n au'.
De Hoad'na, de woa'n schau' weit
und woa'n üwa' a Stund Gehzeit.
Des woa' in de fufz'ga Joah',
do woa' 's mit'n Hoadheigna daun goa'!

Zusatzinfos

• Sunda' = Sonntag
• roas'n = reisen
• Kir'a' = Kirtag, Kirchtag, Kirmes
• hü'zan' = hölzernen
• Ear'a = Ertag, Dienstag (nach dem griechischen Kriegsgott Ares, der bei den Germanen Ziu heißt, von dem der Dienstag kommt) - siehe Bairische Wochentage
• Pfingsta' (auch: Pfinztag) = Donnerstag, von griechisch pente = fünf (fünfter Tag der Woche; vgl. Pfingsten von griechisch pentekos = fünfzig)
• Hoadheigna = auf der Heide Heu machen
• Mohda = Sensenmäher
• Birschtling = Bürstling (Grasart)
• etla' = etliche, mehrere
• Joch = veraltetes Flächenmaß, nämlich die Fläche, die man mit zwei an ein Joch angeschirrten Ochsen pflügen kann; in Österreich: 5755 m² (40 x 40 Klafter = 1600 Quadratklafter); das englische acre (4047 m²) hat den gleichen Hintergrund
• Stosupp'n = Milchrahmsuppe
• schlaump'n = schlempern, schlürfen
• goa' = gar, fertig, vorbei

Quellen

Hans Pichler, Hofedl