Obstgoatn in da Prannleitn

Aus Landschaftsgeschichten
Zur Navigation springen Zur Suche springen

Im Fruihjoah', waun ois bliat
und Blia ma üwaroi nua siacht.
De Hümmischlissal san de erschtn de do blian
und de Wiesn mit göwi Blumenkölche zir'n.
Buschwindreserl, Hümmischlissal, Gänsebleamal, Dotterblumen ois is do
und ois Kind woast üwa sovü Sche'heit recht froh.
A de Poimkatzl, Ölexn, Hosl und Hollastaun,
de haum bliat as wia, kaust mas glaum.
Nochan haum bliat fost dreihundat Obstbam,
in drei Goat'n des glaubt ma kam,
Krichal, Zwetschk'n und de gaunzn Staud'n
Birn und Öpfibam de Blütnprocht, kam zan g'laum.
So woan Bam hint und vorn,
a drum Obstgoat'n.
Da Großonkl der hot vü Obstbam pötzt
und natirli a üwaroi ei'gsetzt,
er hot a Haund g'hobt und a Schneid,
ban Pötz'n und mit'n Dengln a Freid.
A Bamschui hot ea do betrüm
und de ötan Bam san va da Herrschoft nu blü'm.
So hots oiweu geb'n vü Schot'n
und i bi a so hoibwegs grot'n.
Im Summa is daun ois zeiti' woan,
so ungefähr bis noch'n Korn [Roggen],
des Obst des woa a eignes Leb'n,
weus so vü Soat'n do hots geb'n:
Krichal, Kloaöpfi, Howanöpfi und Grafensteina,
Naglwitz, Most, Gute Loise Birn woan feina.
Ban dresch'n woa des oafoch g'wesn
und mia hot jeda Zeit a Obst hoit gess'n.
Es hot a vü Oawat geb'n ban Krichal glau'm
und vü aundas Glaubobst kimmt de gaunze Zeit zaum.
Boid hots geb'm an siass'n Most,
des hot daut bis in Novemba fost.
De Krichal wos ma ei'gmocht hot,
a dreis'g Eima, fian Krichalschnops
und Most hots oiweu vü geb'n,
do hot neam'd braucht van Wossa leb'n.
Waun owa da Most guat woa zan trinka,
haums ban Preveranz'n au gfaungt zan Singa!

Zusatzinfos

  • Fruihjoah' = Frühling
  • Blia = Blüten
  • pötzt = veredelt
  • Preferanzen = ein Kartenspiel

Quelle

Hans Pichler, Hofedl