O'Gei'

Mir geht so vü' o'!

Waun i' spazier'n geh' und denk a wen'g no'h,
do kimm i' drauf, mia geht so vü' o':
Ma hea't mehr koa' Haumma'n van Dengl'n da Sengst,
koa' Kornmand'l siagst mehr, vorbei is' des längst,
Rua'm und Burgunta', des loss' ma oi's bläu'm,
wea' setzt denn heit' nu' a Krautrua'm in d' Häu'm!

I' woaß net, warum des heit' a so is'den,
koa' Heischowa' is' meah' in Summa' auf oana' Wiese'n,
de hau'm so guat g'schmeckt, woa'n so luftig und lind,
heit' san' s' fest z'saum'presst in da' Plastikhaut drin!
Mia hot a' fia' n Klee de Hüfi'n aufg'stö't,
de san' längst schau' va'schwund'n van Kleefö'd.
Wo is' denn da' Hauh', dea' wos 'kraht hot aum Hauffa' van Mist,
oda' de Henn', de wos schea't und d' Reg'nwirma' frisst?
Mia siacht a' koa' Bruathenn' mit de Wusa'l mehr renna',
vü' Sochan tan unsare Kin'a' heit' goa' nimma' kenna'.

Koa's draht meah' de Fiaß' in an Fetz'n fia 'n Stüfi',
wea' essat denn heit' nu' a Schmoi'zbrot mit Zwüfi'?
Auf jeda' Stoi'mau' woa'n Schwoi'mnesta' d'rauf,
a' do hot 's den Aunschein, es hea't se' oi's auf.
In da' G'sö'schoft is' g'sunga' woa'n mit a murds Freid',
Leit'l sogt 's sö'wa' - is' s' net schei' g'wes't, de Zeit?
Aum g'scheita'n, ma denkt üwa'haupt nimma' no'h,
nua' is' a so, es geht oan' hoi't oi'weu' wos o'!

Zusatzinfos

• Haumma'n = Hämmern
• Burgunta = bekömmliche Futterrübe
• setzat = setzte (Konjunktiv)
• bläu'm = bleiben
• d' Häu'm = die Halme
• Hüfi'n = Gestell zum Klee-Trocknen (so sieht das aus)
• Hauh' = Hahn
• Wusal, Singerl = Küken
• koa's draht = keines dreht
• Fetz'n fia' 'n Stüfi' = Stiefelfetzen statt Socken [angenehmer zu Tragen]
• Stoi'mau' = Stallmauer

Quellen

Hans Pichler, Hofedl