Mistlocka

G'schichtl

Ois i nu kloa
und ois Einzl'kind gaunz alloa,
do woa da Misthaufa im Hof in da Mitt'n
und de Mistlocka is g'fährli, des soit i net vaschwitz'n.
Do spü i mit unsan Hund mit Naumen Dackl,
er hot aufpast auf mi er woa koa Lack'l.
Owa de Locka hot mi oiweu intressiert
und i hob mit an Stecka umg'stiert,
des Gleichg'wicht woa dahi'
und i bi in da Mistlocka drin,
se woa jo net tiaf nua a Lackl
und i woa a stingats Packl.

I hob gschrian wia aum Spieß,
das koana g'wist hot wos los is.
Da Opa auf da Denglgoas,
mocht a End meina Mistlocka-Roas,
Za dera Zeit woa a koa Wossaleitung do
und s'Wossa woa in de Graund a so,
es woa a nu niagans a Bod
und des woame Wossa in Schief a grod.
Es woa do hiatzt in Summa kloa,
das i grod a Oawat extra woa.
Owi g'riss'n s'Gwaund net gaunz fei',
muas denn des a nu unbedingt sei,
auf jed'n Foi woa des a extra Tua
und g'woschn bin i woan in an Lawua.
Owa ois Strof' muas i aum höliachtn Tog ins Bett
und des woa fia mi jo goa net nett,
Mei Leb'n hot goa net schlecht tau'
und hi und do, do denk i hiatzt a nu drau!

Zusatzinfo

• Dengelgoaß = Holzbock (bzw. eben Geiß) zum Schärfen (Dengeln) der Sense
• Schief = ein eingemauerter Behälter aus Kupferblech zum händisch nachfüllen im gesetzten Küchenherd

Quelle

Hans Pichler, Hofedl