Millenium im Yschpatoi
"Millenium is' im Yschpa'toi',
dort dearfst d' föhl'n auf goa' koan' Foi'!"
So schreibt unsa' Herr Bua'ga'moasta'
in da Gemeindezeitung, so tuat a'.
A poa' Tog voarhear wird schau' 'plant und 'baut,
und auf d' Kiacha'stiag'n a Hauffa' Schnee hi'g'haut,
a Massa' Hitt'n stengan aum Kircha'plotz,
a jeda' Verein sei' eigen's Stand'l hot.
Es wia'd Silvesta' ba uns in Oi'tenmoarkt,
und ollas schau' auf 's Neiche Joahr schau' woart.
Noch da' Schlussaundocht geht 's schau' in Betrieb:
Glühwein, Punsch, Tee und Met - des is' a Hit!
Bamstummeln stengan hohl und g'schlitzt,
und waun innen de Gluat brennt, gibt 's a Hitz',
Benzinfass'ln hau'm Luckan und san' umfunktioniert,
drin san Kohl'n, de fest wa'man und aussa gliat.
Vü' Kinda' tan Sack'lrutsch'n auf da' Kircha'stiag'n,
so maunche daneb'n kemman und owi'fliag'n.
De Leit', de wea'n oi'weu' mehr,
va' weit und broat kemman s' daher.
Es gibt Gulaschsupp'n van Sportverein,
ba de Kelt'nberger gibt 's an guat'n Wein,
do wea'n net Viert'l und Ocht'l ausg'schenkt
es wia'd auf 'n Naumen und auf d' Gschmockrichtung denkt.
A' de Imker san' guat vertret'n mit 'n Met,
und a' ollas aund're recht guat geht.
Daneb'n steht da Staund van Crazy mit de Krocha',
dass a' da' Ohrwasch'ldokta' sei' G'schäft tuat mocha.
Jugend und Feuerwehr, a' d' Bäurinnen sand do,
und da' Komerodschoftsbund geht do a' net o'!
Geb'n tuat 's vü', mia kau' net ollas kost'n,
weu' wauns da 's net va'trogst, muasst aufi' auf'n Post'n.
Da' Herr Bua'ga'moasta' red't und mocht a Enthüllung goa',
Musikant'n spü'n dazua, es san' a' glei' a poa'.
Wia da' Herr Landtogsobgeordnete üwa 's neiche Morktwopp'n red't,
um Mitternocht leit't d' Pummerin, owa' hear'n tuat ma s' net.
Daun wird Prosit g'wunsch'n, G'sundheit un ollas aund're a',
fia' olle reicht 's sicha' net dazua, des wa' schwa'.
So woar 's im letzt'n Joahrtausend, schei' woar 's vor oll'n,
und es hot de Feier mit Sicherheit an jed'n g'foll'n!
Zusatzinfos
- Ohrwasch'ldokta' = Hals-Nasen-Ohrenarzt (wegen Knalltrauma von Silvester-Knallkörpern)
- Posten = Gendarmerieposten (heute: Polizeirevier)
Quellen
Hans Pichler, Hofedl
