Locha

Waun oana locht di' au',
na wos glaubst dan, wos des oi's kau',
fia di' is' des a Freid,
do glaubst d', dea nimmt se fia di Zeit
und des stimmt a gaunz genau,
dea is' offa' fia di und tuat da trau'.

Heast da du owa wos Lustig's au',
daun san deine Herzmusk'ln drau',
bis dreihunda't Musk'ln tuast du do beweg'n,
wos glaubst du, is' des fia di' fia a Seg'n.
So is oa Fü'm zan Locha grod g'mua,
fia zwoanz'g Minut'n Aerobic pur.

A so a Witz, dea wiad duach d' Oawasch'l g'heat,
in Sprochzentrum wiad a 'test't: wos is' a wert?
Van link'n Hirn geht a ins rechti,
duat hoaßt 's "Locha mecht i'!"
A Schwa'oawat is des in de grau'n Zell'n,
des treubt da de G'sundheit hoch, des wiast d' seg'n.

Kau'st an Tog amoi goa net locha,
daun brauchst d' nua a Übung mocha.
De Finga, mit de ma tuat auf d' Leit' hi'zoag'n,
tuat ma ins Mäu' einitoa'n,
do zaht ma daun a wengl au',
und schau' glaubt 's Hirn, du host an Grinsa tau'!

Bist du kraunk und host Schmerz'n,
daun denk auf wos, wo st' locha' kau'st van Herz'n,
weu' a jeda' Lochau'foi', dea is so vü' guat,
fia Leib, Sö' und a fia 's Bluat.
Des Locha tuat de Schmerz'n in dia stüll'n,
und duach de Sö'bstheulung, do tuast de vü' bessa fü'n.

D'rum schau wos, wo 's gibt zan Locha,
wo st' kau'st an Pfugatza mocha,
owa loss di' jo net untakriag'n
und pfleg mit 'n Locha dei' Hirn.
Du brauchst net denka, wos muass i' fia mei G'sundheit mocha,
do brauchst nua oa'foch herzli' locha!!

Zusatzinfos

• trau' = (ver)trauen
• Sö' = Seele
• Mäu' = Maul, Mund
• Pfugaza = ein Lacher
• Locha = Lacher

Quellen

Hans Pichler, Hofedl