Loamdorf am Bergal

G'schichtl

Unweit fa unsan Haus is a kloans Hügal, des hod fa uns Kinda a jeda kennt,
mia homs oafoch nur liebevoll des Bergal gnennt.
Stundenlaung samma durt gsess’n haum oft Raum und Zeit vagess’n
Haum gsunga spüd und blauscht
Nembei hod des Bachal grauscht
San durt oft glengn, dan oafoch nur ind Woick’n schaun
Do foits uns ei’n damma do am Bergal uns a’ Loamdorf baun
Ois Baubewilligung sozusogn
Miassma zerscht in Votan frogn
Da Vota sogt jo Kinda wos datzdan heit so frogat schaun,
Vota derfma durt am Bergal uns a’ Loamdorf baun
Freuli derft’s es baun,nua auf’s Kiah hiatn derf’s hoid ned vagessn
Ned das uns de Kiah de Ruam und’s Kraut Kraut ohfress’n
Hintan Haus barra Runsn auf da Gschet’n nem da groß’n Staun
Do derfst fia eicha Dorf den Loam obaun
Do woa ba uns Kinda de Freid riesengroß
123 es geht schaun los
Unsa Poit des is schau’n a storka Wast’l
Dear fohrt mit’n Schugorm drauf des Meutakast’l
A’ jeda hod grom und g’schaufit
Koanna hod sie ziead
Daun hauma in Loam zan Bergal gfiad
Meine Briada baun de Kiacha groß und sche’n
Nembei duad da Pfoahof stei’n
Mei Schwester baut de Schui des hod an Sinn
Gleichzeitig is a’de Lehrarin
S’nochba Dirndl i erinner mi genau
De woar im Doarf de Bäckersfrau
De hod des woa Procht
Aus Loam kloanes Brot und Seumin gmocht
Mia haum baut a Wirt’shaus sozusogn Beiß’l
Und am End van Doarf des Oarmanhäusl
Gemeinsaum hauma baut boid haumas g’schofft
A’ riesengroße Laundwirtschoft
Mia haum baut Wohnhaus Stodl Stoi
Und rundumatum an Zaun daun überoi
Schein hauma spüd,des vagiesi nia
De Fiachtanzäpfan worn de Kiah
Jo und i woas nu gaunz genau
De Fähranzepfan worn de Sau
Oachln wert’s a’ jeda kenna
Des woarn bei uns de Henna
Und runde koani weißi Kitzlstoa
des woan im Nest de Oah
Zwoa kuazi Steckan mitt’lgroß
De hauma einspaunt daun ois Roß
Da Nochbarbua spüd a nu mid
Er hod gsogt er is da Schmid
Und duat uns sozusogn
Unsari Reßa neich beschlogn
So hauma erschoff’n unsra eigne Wöld
Do samma draufkemma ,das uns via de Kich’a nu de Glock’n föd
Jo des Rätzl des is schwea
Wo nehma bloß a Glock’n her
Des gaunzi loßt uns laugn koa Ruah
Do hearma mit da Glock’n leit’n unsa Kuah
He Kuah bleib steih’n du blede Nock’n
Zah wos brauchst dan du a Glock’n
Hiatzt brech’n aun ondare Zeit’n
Mia miass’n mid da Glock’n leitn
Jo mia Kinda mia woarn listige Frotz’n
Mia miass’n da Kuah den Gora grotzn
Sowos hod de Kuah am liabst’n meg’n
Schaun streckts uns in Hois entgeg’n
Während mia ihr den Gora grotz’n hot de Kuah ned kapiert
Das ma ihr de Glock’n o’montiert
Daun samma mid da Glock’n g’rennt fost gflog’n
Und haum de Glock’n in unsa’n Kiachturm aufie zoag’n
De Kuah schaut uns va da Weit’n zua und ihre groß’n Aug’n loßt’s zornig roin
De Kinagfasta hauma mei scheini Glock’n stoin
De Muata schreit Kinda kemmtz ess’n es is Zeit
Und mia haum zum Gebet hiatzt hiatz mid da Glockn gleit
Zum Schluß kimmt des ollabest
Mir feian heut des Kichweihfest
An oidn Hefascheam ois Weihwossakess’l
Er hod a Lucka rinnt a bissl
Ois Weihwossapinsl haum a nix g’scheit’s ned gfuntn
Haum a Steckal gnuma und a Fetzal uma bunt’n
Unsa Franz ois geistli Hear , stoiz duat er dahea maschiern
Und i und da Sepp dan ministrirn
Und nehm da Kiacha de Menschaschoa
Des is unsa Kirchnchor
Während der Segnung hod da Chor gsugan lobet denHerrn
So soll dieses Dorf gesegnet wern.
Woch’n spähra duri ban Stubnfensta außischau
Do kauni meine Aug’n ned traun,
do siachi mit Entsetzen
de Kua durtsi ban Kirchtuam in Hois owetz’n
i schreih blede Kuah geh wega do bist deppat
do is da Kirchturm schaun auf Erd’n g’scheppert
i renn schrei fluach und bet
de Kua hod unsa gaunzes Loamdorf z’ret
wia i zan Loamdorf kim is schaun ollas spod
siach numehr wia de Kuah wegrennt und in Schwoaf aufdrad hod.
Öd is am Bergal woarn, traurig stad,
va Nord’n her da Schneewind wahd
dichta Schneefoi deckt des Beagal zua,
des, des woa de Rache fara Kuah.

Zielgruppe

naturinteressierte Personen, Wanderer, Ortskundige

Quelle

Original von Ignaz Leonhartsberger