Liachtmesstag
A Baunfei'ta' woa' da Liachtmesstog,
wo ma oi'weu' den Weg in d' Kia'cha g'fund'n hot.
Do is' de Kerz'nweih' g'wes'n
und za Weihnacht'n hau'm Dienstbot'n do an Wochsstock g'seg'n,
den s' van Bau'n oi's Christkind'l g'kriagt hau'm,
dass ma's im Joah' a Kerz'nliacht g'hobt daun.
Meist'ns woa' a' in da Kia'cha da Blasius-Seg'n,
dea' is' geg'n de Hoi'skraunkheit'n g'wes'n.
"Scheint de Sunn üwa des Wochs [Kerzen],
draht se' um da' Dochs [schläft weiter]."
"Heit' is' a schena' Tog, singan de Moas'n,
aum Liachtmesstog, do meas' ma roas'n."
So woa' aum Liachtmesstog z' Mittog de Frog,
ob de Dienstbot'n foa't gengan oda' bleib'n wieda' do.
Des woa' der "Schlenggeltog" zan Fortgeih', hl. Blasius,
Truhantog, bis zur Hl. Agatha da' Dienstbot' fort sei muass.
A' 'in Tog kennt ma schau', dass a wochst:
a gaunze Stund des deitlich mocht.
Der Tog der wochst:
Za Weihnacht'n um an Muggenschritt,
Neujahr um an Hauh'tritt,
Dreikönig um an Hirschensprung
und Liachtmess um a gaunze Stund'!
So hot ma friaha' a' guat g'lebt
und woa' zu anaunda' a' nu' nett.
"Wann 's za Lichtmess stürmt und schneit
daun is' da Frühling nimmer weit."
Zusatzinfos
- Bauernfei'ta' = Bauernfeiertag
- Liachtmesstog = Feiertag "Maria Lichtmess", 2. Februar
- Christkind'l = (hier:) Weihnachtsgeschenk
- Blasius-Seg'n = Segensspendung am Feiertag des heiligen Blasius von Sebaste (3. Februar); der Segen wurde oft auch schon am Vortag, also zu Maria Lichtmess, gespendet
- Hl. Agatha = heilige Agatha von Catania, Feiertag am 5. Februar
Quellen
Hans Pichler, Hofedl
