Krautei'howin

Auf an Bifaung, schei' an' groß'n,
do is des Kraut fia 's Haus do oi'weu' g'wox'n.
Es hot laung 'braucht, dass is' zeiti' woa'n,
da Nöwi' hot 's growit in Krautgoat'n.
Feste Hapi' meass'n 's sei',
daun eascht fiah't ma s' aum Stodltenn' ei',
mit 'n Wog'n oda' Schubkoa'n
wia'd des Kraut hoam g'foah'n.
Noch ana Zeit, do geht ma drau'
und faungt mit'n Krautei'schneid'n au'.
Daun hot ma de Stub'n g'richt
und hot den Fuaßbod'n aussig'wischt.
Aum Bod'n hot ma a Lei'tuach unta'glegt
und zwoa Sess'ln mit'n Krauthowi draufg'stö't.
Hiatzt geht 's au' mit da Hoblarei,
de Weiba'leit' richt'n de Hapi' zan Hoi'wia'n glei'.
De Bletsch'n kemman oi's erschta weg,
und a' den Strunk, den nimmt ma' net,
so san de Krauthapi'n hoi'biert,
boi' 's Kraut ei'g'howit wia'd.
Des beste woa' a Krautbotin aus Stoa',
zua' Not muass 's a hü'zana a' toa'.
Ei'g'soi'z'n mit vü' Kümmi' und Soi'z,
dass 's jo recht guat wia'd und hoi't,
fest ei'trett' an gaunz'n hoi'b'n Tog,
des nimmt oan' hea' - is' goa' koa' Frog'.
A gaunz's Joah' fia' a Hauffa' Leit
braucht ma a Weu' a sau's Kraut de gaunze Zeit.
In Kölla' trog'n hot ma des mit an zoa'nan Koa'b,
so is' des g'schnitt'ne Kraut kemma' ins Oa't.
Zan Schluss nu' auf 's ei'g'soi'z'ne Kraut a Brett
und mit an Stoa' ei'g'schwa't, dass 's es 'ieda'presst.
Woa' daun dea' Tog zan Schluss um,
daun is' nu' rund gaunga in da Stu'm!

Zusatzinfos

• Bifaung = schmaler langer Acker
• oi'weu' = allweil, immer
• g'wox'n = gewachsen
• zeiti' = zeitig, reif
• Nöwi' = Nebel
• growit = durch Kälte reif geworden
• Hapi' = Happel, Krautkopf
• eascht = erst
• fiat mas ei= Heim führen
• ei'g'howit = eingehobelt, Kraut geschnitten für Sauerkraut mit Krauthobel
• Stu'm = Stube
• Lei'tuach = wurde Kraut darauf geschnitten
• Hoblerei = Kraut wird mit K.Hobel geschnitten
• Weiwaleit = Frauen
• Hoi'wia'n = Halbieren
• Bletsch'n = Außenblätter beim Krautkopf [Viehfutter]
• Strunk = Krautstiel
• hü'zana = hölzener (hier: Bottich)
• ei'trett' = mit den nackten Füßen getreten
• Hauffa' = Haufen, viele
• sau's = saures
• zoa'na Koa'b = Holzkorb-Schwinge
• Oat = (das) Ort, Ziel
• ei'g'schwa't = beschwert
• rund gaunga = Stubentanz getanzt

Quellen

Hans Pichler, Hofedl