Howanheigna

Da Howan woa gaunz wichtig auf jeden Hof,
ois erschtas amoi fia de Ross,
woa de Howankist'n voi,
daun woas fia d'Ross zan woi.
Seit dass a Ross an Howan kriagt
a jed's Ross vü bessa ziagt
und a des Howanstroh,
woa fia d'Leit und Viecha do.
Mitte August do wiad da Howan g'maht,
mit da Sengst und Mohdruat'n, dass in Howan net draht,
ban Mahn do hot mas Madl g'richt,
das da Howan do schei liegt.
Weu mia muas mit'n Rechastangl umileg'n,
so is des Howanheigna gaunz genau g'wes'n.
Waun da Howan daun schei diar' das krocht,
hot ma daun mit ana Hützan Gowi Madl g'mocht.
Daun hot ma de Schüwin g'roacht,
do hot se daun da richtige Roacha zoagt,
de Fostarin hot de Stumpf schei aussi tau,
dass olle Howanhardl bleim drau.
Waun des Fadl grauppat woa,
daun haum de Zwoa net guat kinna, des woa kloa,
und woa des Fadl in Stodl do,
hot ma glad, den Howan aum Howanstock o'.
Mi'n Mistkreu hot ma ausanaunda zaht
und host ban trett'n koan Ochs'n, des woa fad,
weu ban Howanstock hoast's trett'n, trett'n, trett'n,
so kau ma in Howanstock vü Howan eini nett'n.
Da Plotz aum Stock woa weng und ra',
dass koa Platzl ninascht mea üwa wa'.
Des woa daun de g'wisse Zeit,
da Howan sticht und des woa d'Freid!

Zusatzinfo

• Howan = Hafer, Kraftfutter für Pferde
• Howanstock = Ort, wo der Hafer gelagert war vor dem Dreschen
• Howankist'n = Neben der G'hack'-Kiste war die Kiste für Hafer
• G'hack' = Kurz geschnittenes Futter für Pferde aus Haferstroh und Klee
• Howan sticht = Liebeszeit
• Leit = Leute
• Viecha = Tiere
• Madl g'richt = die Mahd richten
• Howanschüwi = Hafermenge für eine Gabelvoll zum Reichen
• Had'l = Haferrispe
• Mistkreu = Mistkralle
• Mohdruat'n = Mahdrute bei der Sense damit Hafer, Roggen und Weizen in einer Richtung liegen

Quellen

Johann Pichler, Hofedl