Hoad'n

Offizieö' „Koppelfö'dwies'n“ hot ma 's g'nennt,
oi's „Hoad'n“ hot ma s' aum Ostrong g'kennt'.
Boi'd a jeda' hot a so a Hoad' g'hobt,
so woa' 's weg'n da' Fuarda'not.
Da' Birschtling woa' des meiste Gros,
Mah'n hot ma 's kinna', waun 's a' woa' noss.
Hoadmah' g'gaunga is' ma' zeitig in da Friah,
mit da Sengst aum Bug'l und an Blutza' Most, den va'gisst ma nia.
Wia de Sunn' aufg'gaunga' is', hot ma schau' g'maht,
do hot ma net laung 'um'zaht.
A guate Schneid', des woa' do Pflicht,
dass ma 's mit wen'g Kroft hot g'richt't.
Mausloata'n, Erika, Ruchgros, Sau'raumpfa', und Birschtling in Hi'
und Kräuta' wia Arnika, Schofgoa'm, Thymian, Johanniskraut und in Ki'.
Oa' Mo'da' hot a' meist'ns an Stoch'l dabei,
und mit 'n Deng'lhaumma' schlogt a' 'n in an Ba'mstumpf ei'.
A poa' Joch woa' a so a Hoad' boi'd groß,
mit a' via' - fünf Mohda', do geht 's los,
um a sie'mi' san' de Weiwa'leit mit da' Supp'n g'kemma',
do meg'n de Mohda' schau' zuag'lenga'.
Daun is' a' oft 'deng'lt woa'n,
waun 's wo einig'gaunga' is' in an Stoa',
waun de Dia'nd'l und de Dirna' de Mohd'n hau'm z'schlog'n
und de Mausloata'n, Dee'n und Dist'l austrog'n.
Van Raund a wen'g zuwi'g'recht,
dass ma se' nochhea' leichta' toa' mecht'.
Um ö'fi z' Mittog, do wiad 's daun goa'
des Mah'n auf da Hoad'.
Waun de Weiwa'leit oi's hau'm zuwig'schert,
wia'd daun nu' oi's umg'keahrt.
Späta' daun auf spot
wea'n daun de Schäwa' g'mocht,
So geht da' erschte Tog auf da' Hoad' zan End',
hoffantli' is' moa'g'n a' wieda' schei'!
Den next'n Tog daun in da' Friah
geht mei' Mama daun mit mia'
auf de Hoad' des Fuata' z'strah', des muass ma toa',
i' woa' jo domoi's a' nu' a wen'gl kloa'.
So hot s' mi' hoi't daun da'biss'n
und in Schott'n auf de' Wies'n.
Da Doktor Kofler foahrt mit seina' Maschin'
auf unsara' Hoad' aum Tafa'lsteig dahi'.
Mei' Mama heart des Motorrad'l foah'n
und is' glei' renna't woar'n.
Owa' da' Herr Doktor hot mi' schau' va' da Weit'n g'seg'n,
wo i' do in Schott'n bi' g'leg'n.
I' hob des Obenteuer jo va'schloffa'
dazöh't hot ma des mei' Mama laung' nocha'!

Zusatzinfos

• Fuarda' = Futter
• Birschtling = Bürstling, Borstgras (Hartgras)
• Bug'l = Buckel, Rücken
• Blutza' = großer Behälter (für Most)
• Mausloata'n = Farne (Mäuseleitern)
• Hi' = schlecht mähbares Gras
• Ki' = Kümmel
• Mo'da' = (Sensen)Mäher
• Stoch'l = kleiner Amboss zum Schärfen (Dengeln) der Sense
• um a' sie'mi' = um 7 Uhr
• Dee'n = Dornen
• austrog'n = wegtragen, aus dem Futter entfernen
• zuwig'schert = zusammengerecht
• umg'keahrt = (das Futter) gewendet
• Schäwa' = Heuschober
• z'strah' = zerstreuen, ausbreiten
• hot 's mi' da'biss'n = bin eingeschlafen
• Tafa'lsteig = Steig nach Maria Taferl
• renna't woa'n = rennend geworden, zu laufen begonnen

Quellen

Hans Pichler, Hofedl