Hausfreind

Des Ehele'm va' oana' Frau
is' oft net rosig, sonda'n meah' grau,
va' lauta' Putz'n, Kocha', Stopfa',
füh't sa se' oft oi's Eheopfa'.
Da' Ehemau' hot vü' z' wen'g Zeit,
ea' kümma't se' z' wen'g um sei' Weiwa'leit,
do hü'ft koa' Bet'n und koa' Fluacha',
do gibt 's nua' oa's: an Hausfreind suacha'!
Da letzte Schrei auf dera Wö't,
des is' a Hausfreind mit vü' Gö'd.
Und weu' i' do a' net z'ruck steh',
tua i' ma oan suacha' geh'.
Schnö' zan Frisör und a neix G'waund,
und schau' nimm' i' de Soch in d' Haund.
Den Saumstog wia' i' 's glei' probier'n
und mecht an fesch'n Mau' verführ'n.
Mei' Schwesta' gibt ma do an Rot,
weu' sie schau' läng're Zeit oan hot:
A kurz's Reckerl, des ziagst au',
do tuat a jeda' nochischau',
a guat's Parfei', des is' a Soch',
do wia'd daun fost a jeda' schwoch.
Und tuat da Ehemau' a' nu' so spinna',
dea' Ehering muass owa' van Finga',
weu' siacht den Ring a fremda' Mau',
dea' beißt daun sicha' nimma au'.
D'rum sog i' da', moch 's wia i',
dann gibt 's an Hausfreind a' fia' di'!
Auf oa's pass auf, i' sog' da' 's glei':
Gö'd soi' a' ho'm so wia Hei',
damit a' di' va'wehna' kau',
sunst kunnst a' dahoam bleib'n ba dein' Mau',
weil der tuat spoar'n bei seiner Frau,
braucht 's gaunze Gö'd zan Heislbau'.
I' kaun do aus Erfahrung red'n,
bei mir dahoam is' a' so g'we'n,
und wia ma net nu' red'n davau',
do geng' ma 's a' glei' richt' au'.
Aum Wochenend' is' wo a Fest,
do mochan mia zwoa glei' an Test.
Aum Saumstog ziag i' au' mei' G'waund
und siach, wia mei' Mau' schau' staunt,
d' Frisur richt' i' ma a' gaunz schick hea',
zupf' a poa' Hoa' hi' und hea',
des G'sicht nu' schmink'n mit vü' Foa'm,
hiatzt schau' i' richti' aus und nimma oa'm.
Ba'n Mau', do wer'n de Aug'n schau' groß -
ea' frogt mi' glei': "Wos is' heit' los?"
"Jo foa't geih' tua' i' auf a Fest,
i' muass nua' ausprobier'n an Test."
"Und warum richt'st d' de' denn so schei' hea',
bi' i' da nimma guat gmua' nimma mehr?"
Za'n Glick is' hiatzt mei' Schwesta' g'kemma' schau',
mei' Mau' hot a' nu' an Brumma' daun 'tau'.
Gaunz happy kemm' ma au' aum Fest,
es san' schau' do an Hauffa Gäst',
mia gengan hi' glei' za da Bar,
doa't stengan a' etla' fesche Hawara.
I' siach an Reich'n mit vü Gö'd,
des is' genau des, wos ma' föh't!
Hau'm mia a Glick, dea' lond't uns ei',
bestö't uns glei' a Vierterl Wein.
Mei' best's Locha' setz' i' auf,
i' siach genau, do steht a' drauf.
A etla' Viertaln hau'm ma 'trunga',
es wia'd schau' in da Rund'n g'sunga,
und a poa' Witz werd'n a' voa'brocht -
de gaunze Rund'n schreit und locht.
Gaunz nohe kimm' i' hiatzt mein Zü',
und frog 'n ob leicht a' taunz'n wü'.
Ea' hot sei' Vierterl owi'trunga'
und hot mit mir sei' Taunzbein g'schwunga',
auf d' Zehan is' a' ma fest g'stieg'n,
i' hob dabei schau' fest g'litt'n,
noch drei, vier Tanz' woar 's mia schau' z'wida',
schnö' hob i' g'sogt: setz ma uns nieda'.
I kenn eahm de Erleicht'rung au',
zan Taunz'n is' a' nix, dea' Mau'.
Und aun der Bar hot er bestö't zum Trost,
ea' hot an Hauf'n Gö'd, egal wia vü' wos kost't.
Ea' lond't de hoi'we Bar fost ei',
jo des kau' nua' a Reicha' sei'!
Zwoa Schnapserl san ma a' nu' recht,
bis i' merk: mia wia'd schau' schlecht!
Und wia 's schau' spät is', wird 's zan Zahl'n,
do bin i' fost van Hocker g'fall'n.
Mei' Hausfreind hot se' wegga g'schlicha',
hiatzt hob de Rechnung i' beglicha'!
Zwoa Blaue hob i' zoih't und 'plärrt -
is' denn a Hausfreind so vü' wert?
Mei' Schwester, de kau' wos daleb'n,
weil de hot mir jo den Rot 'geb'n.
A Wut im Bauch, koa' Gö'd im Sackl,
schleich i' mi' hoam hiatzt wia a Dackl.
Und wia i' heit' a Pech nu' brauch,
woa' zum Glück a' mei' Mau' nu' auf,
und wia ea' mei' laung's G'sicht hot g'seg'n,
hot a mi' g'frogt: "Is' 'leicht wos g'scheg'n?"
I' hob' des gaunze üwa'spü't,
do' innerlich, do woa' i' nu' wü'd,
schau' glei' hätt' i' vom Test wos g'sogt,
doch 's schlechte G'wiss'n hot mi 'plogt.
Gaunz laungsaum geht ea' auf mi' zua,
mei' Herz hot 'klopft - wos moch' i' nua'?
Schimpft a' oda' haut a' zua,
mia' hätt' 's g'hert, mir bled'n Kuah.
In seine Arm hot er mi' 'druckt
und hot gaunz kräftig owi gschluckt,
ea hot mia g'sogt, ea' hot mi' gern,
des gaunze wird schau' wieda' wer'n.
Mei' Lebta' schau' i' koan' mehr au',
für mi' gibt 's oi'weu' nur mein' Mau'!

Quellen

Hans Pichler, Hofedl