Haundschlogziag'l

Aus Landschaftsgeschichten
Zur Navigation springen Zur Suche springen

In Miadla-Ziag'l va da Hoad,
den gibt's schau üwa hundat Joah'.
Van Yschpatoi gibt's do den best'n Loam,
do is' bis 1980 nu Ziag'l g'schlog'n woa'n.

Oi's erschta hot ma den Loam owagrob'n,
hot man auf an Tisch tau', auf an groß'n,
doat hot ma mit Wossa und an Saund daun knet't
und mit de Fiaß' fest o'tret't.

Oft haum des Kinda g'mocht,
des woa' oft a Gaudi und de hau'm dabei g'locht,
dass a g'schmeidi' is' woan,
so is' gaunga mit den Haundschlogziag'l-Loam.

Des nexte woan de Ziag'lmod'l daunn,
de hau'm aum Bod'n de Miadla-Initialien d'raun.
Wo der Ziag'lschloga vaewigt woa',
fia hunda't Joah' sogoa'.

'In Loam fest einig'schmiat in d' Form,
dass a uandlicha' Haundschlogziag'l is' des woa'n.
Zu zweit haum s' Ziag'l g'schlog'n,
und da dritte hot daun daunitrog'n.

De Ziag'l san auf oana Bruck g'leg'n,
zan Trickan woa 's guat g'mua, nau eb'n,
waun ma 's daun aufg'stö't hot,
woan s' boid trucka grod.

Den next'n Tog kemman s' unta's Doch,
dass Reg'n und Sunn' hot nix mea' g'mocht.
Taus'nd Ziag'l woa a scheine Zoih',
des haum s' g'mocht oi' Tog auf jed'n Foi'.

Unta Doch hot ma' Stellag'n g'hobt,
wo ma' d' Ziag'l aufg'schrag'lt hot,
so hot ma' fünfazwoanz'g Tog so tau',
daun fü't ma den Ziag'lofa' daun au'.

Da Vort'l, dea hot 's Haundwerk trü'm,
so hot ma' oi'weu' g'oawat Richtung Ziag'lofa' hi',
es woa da Ziag'lofa' gaunz schei' groß,
fünf moi' fünf und via Meta hoch.

G'hoazt hot ma' den Ofa' mit woach'n Hoi'z,
dass de Ziag'l net z'reiß'n soit.
De Ziag'lschloga haum schau' wos kinna miass'n,
weu' sunst de Qualität va de Ziag'l hot 's meass'n biaß'n.

Es san' drei Ofanluckan g'west,
zerscht hot ma laungsaum g'hoazt und daun fest.
De letzt'n drei Tog hot ma dua'ch brennt
und de Ziag'lschloga woan glickli' aum End'.

G'rauckt hot de gaunze Geg'nd
fünfazwoanz'g Meta' Hoi'z woan a weg, nau eb'n,
und wia 's noch 'n Kriag daun woa',
woan de fünfazwoanz'gtaus'nd Haundschlogziag'l a boid goa'!

Quellen

Hans Pichler, Hofedl

Siehe auch