Grant'scheam

Aus Landschaftsgeschichten
Zur Navigation springen Zur Suche springen

Wia 's ma geht, do frogst mi' du,
nau jo, leb'n tua i' grod nu'.
I mecht zu zweit wos mocha, kau' nix toa,
weu' bi' i' zu zweit, bi' i' boid alloa.
Und warum, glaubst d'? Weu i' oi's bessa woaß,
do kimm' i' ma' via wia in No'ban sei Goaß.
I kau a' net dischkarian,
weu do a' boid d' Fetz'n fliag'n.
Es geht ma hoit a jeda aus 'n Weg,
weu' hoi't oi'weu' oi's ba mia liegt, es is' hoi't a Dreck.
Red' ma üwa Leb'n und Sinn,
do is' ba mia schau' goa nix drin'.
Glaub' i' amoi in an Wirtshaus, do wa' 's schei',
daun wea' ma streita't üwan Wei',
üwa d' Kinda, de nix taug'n,
oda goa üwa d' Kiacha und üwan Glaub'n.
Locha' kau' i', glaubst d' mas g'wiss,
owa nua' höhnisch, und do vazaht 's ma' mei' G'frieß.
Freind hob i' g'hobt grod g'nua,
nua' friaha', weu' hiatzt i' a' oi's bessa' wiss'n tua.
Mei' Oide, nau jo mei',
des woa friaha a' nu schei',
daweu' i' nu a kloana Mau',
do woa nu ollas guat und hot 's nu tau'.
Hiatzt gei' ma uns geg'nseiti' aus 'n Weg,
und des is fia uns zwoa hoit goa' net nett,
owa wa' i' fia d' Liab' a' oa'moi' do,
daun geht ma' a' a g'wisse Steifheit o',
des oanzige, wos steif is nu' ba mia',
sand d' Hax'n und a d' Knia.
Und warum glaubst, is' ba mia ois hi',
jo warum? Weu' i' hoi't a Grantschea'm bi'!

Zusatzinfos

  • No'ban = Nachbarn
  • d' Fetz'n fliag'n = der Streit eskaliert
  • Gfrieß = verzogenes Gesicht-Grimmasse
  • Oide = Ehefrau
  • kloana Mau' = ein Mann mit Hausverstand
  • 's hot nu tau' = es hat noch funktioniert, es war noch in Ordnung
  • d' Hax'n = Füße
  • d' Knia = die Knie
  • Grantschea'm = Grantscherben - ein grantiger (misslaunischer) Mensch

Quelle

Hans Pichler, Hofedl