Gebeugte Häupter

Bin i' za oana Sitzung g'foah'n,
wo a' hauffa Ehrengäst' a' woan.
Do san a' a poa' g'sess'n va da Direktion,
van Ausseg'n kennst d' de Herrn jo schon.

Net 's Oita mocht des aus,
's Ausseg'n is' oft a Graus.
Se huckan do, de Ö'beg'n auf 'n Tisch au'gloa't,
in Bugl hoit'n s', wia waun a Kotz do huckat, ma moa't,
in Kopf grodaus, dass oi' Leit seg'n -
dass ma nua so hucka tuat meg'n?

Duach de Brüll'n, do stia'ns de au',
des is' koa g'miatlig's guat's Schau',
und locha tan s' nua mea mit Muaß,
recht trucka foit aus ea' Gruaß.

Es föh't woah'scheinli' des noamali Denka,
drum kinnan s' da' koa' herzlig's Locha schenka.
Mia siacht va da Weit'n, dass de schwa' trog'n
und miass'n aundascht denka, ois wos daun sog'n.

A dowida Dokta muasst vielleicht sei',
kaus't nimma aus'n Herz'n locha, jo moast, des is' schei'?
Va da Weit'n siacht ma 's ban Geih' und Hucka:
ba de muass do' ea' Aufgob sauwa drucka.

Es schaut aus wia ba da Kaisazeit,
san' des in da Stodt a lauta großschädlade Leit.
Do tuat ma schau mei'oafoch's Leb'n
jo vü' mehr aun Lebensfreude geb'n!

Zusatzinfos

• Oita = Alter
• huckan = sitzen
• Ö'beg'n = Ellenbogen
• Bugl = Rücken
• Brüll'n = Brille
• g'miatlig's = gemütlich
• Großschädlade = höhergestellte Personen

Quellen

Hans Pichler, Hofedl