Fufzgajoahr

Es woa' in de fufzg'a Joahr'n,
in Yschpatoi san nu ka' m' Auta g'foar'n.
Koa Bundesheer hot's nu net geb'n,
weu de Russ'n nu do san g'wes'n.
Des Gö'd woa' domoi's nu vü' Wert,
nua hot ma domois a koan jammern g'hea't.
Olle woa'n in Gaunz'n z'Fried'n,
in an Sunnda woa ollas nu in da Mess a drin'n.
De Kiacha woa' in Friach'n und in Spot'n voi',
so wias hoit heit a nu sei' kunnt und a soi'.
Do siacht ma dass des Kiachagei vü' g'sinda woa',
weu mit'n Auta do' a jeda vü' weniga foah't.
Owa a aum Nochmittog in Seg'n,
do sand e'zeit a Leit g'wes'n.
Da Bau' hot sei Müchkaunna mit da Krax'n trog'n,
zan next'n Müchbank'l, doat is kemma da Müchwog'n.
Oan Schülling hot's via an Lita' geb'n,
und a guate Kua fu'fzan Lita' do woas schau' guat, nau eb'n.
A Moasta-Stund' hot a an Schülling kost'
und a Fufz'gal wert woa a Kriag'l Most.
Da Oawata hot do Dreihundat Schülling Monatslau',
wia vü' hot do Oana au'g'faungt, wos hot a do schau tau'.
Woa a owa oawatslos und hot stömpi'n gei miass'n,
dreiß'g Schülling d'Wocha und zwoa moi auf'n Fiaß'n.
Se san goa va' Dorfstett'n auf Oit'nmoarkt gaunga',
do is auf da G'moa oft g'staund'n, a gaunze Schlaunga.
Woa' dea' a wen'g a Wiat'shaus-Bruada oda' Schlawina',
daun haum de gaunze Wocha nix g'hobt, Wei' und Kinda.
Um zehn Grosch'n hot's a Stoiwerk geb'n,
wia söli' woan mia Kinda, des woa a Leb'n.
Dreiß'g Grosch'n woa a Sömmi' wert,
host d'rum bett'lt, haum di d'Öttan goa net g'heat.
So hot hoit a jeda domois spoa'n miass'n,
a jeda' woa z'Fuaß au'm Fiaß'n.
Woa' a junga' Bua' ba de Mentscha z'fria drau',
do haum de ötan' Buam daun des E'ane tau',
se haum eahm z'saumg'faungt, den g'wiss'n
und haum eahm in Hausgraund eini g'schmiss'n.
Er woa' daunn patsch noß am End'
und is' aum schnöllst'n Weg hoam g'rennt.
so hot's ausg'schaut in de Fuchz'ga Joah',
wia mia nu ziemli' kloa.
Mia nennt's hoit de Guate Oite Zeit,
vielleicht stimmt's a, mia hot mit Oin nu g'hobt a Freid'.
Es woa' hoit a jeda domoi's z'fried'n,
a jeda hot bessa g'schlooffa und hot kinna' bessa lieg'n.
Hiatzt glau'ma' mia haum oi'weu nu z'weng'
und d'Oawat wiad uns z'vü und s'Leb'n wiad uns z'eng!

Quellen

Original Hans Pichler, Hofedl