Fritz des letzte Ross

Es woa' in Neinzahnhundertoanasechz'ga'-Joah'
aum Koarfreitog, mit de Ross wird 's laungsaum goa'.
In da' Prannleit'n faung' ma a neix Haus au' zan bau',
da Cata'pilla' woa' schau' ban Köller-Ausheb'n drau'.
I' hoi' ma den Fritz aus 'n Stoi'
und ei'g'schier'n hoi't auf jed'n Foi'.
Howan ei'stroafa' hob i' daun 'tau',
mit an Mistlod'n faung i' daun au'.
A poar Hei'kett'n van Loata'wog'n,
mit de wia'd da Mistlod'n 'zog'n,
üwa' a Oa'spa'l viare zan Strong,
so ziagt ma den Mistlod'n daun.
I' steh daun aum Lod'n drauf,
lenk'n tuat ma mit 'n Loatseu' schei',
waun a Ross brav geht, so soi' 's sei'.
Des Ross, da Fritz, dea' geht schei' flott dahi',
au'gstrengt hot a' se' do dabei nie,
in a poa' Stund' is' da Howan nieda' g'stroaft,
und mia hot se' 's Howanwoiz'n glei' da'spoa't.
A poa' Joah' davoa'
woa' i' nu' kloa'.
Wia i' 'in Fritz schau' ei'gschirrt hob,
mit 'n Kiss, mit 'n G'lenga hob' i' mei' Not,
do sog i' zan Ross do "Fritz!" soglei'
und ea' is' mit 'n Kopf herunt' daun glei'.
I' muas eahm des Kiss daun üwa' 'n Kopf driwa' ziag'n,
do kennt ma schau': a so a Ross hot a' a Hirn!
Des sö'wi woa' mit 'n Kummat daun,
so kimm' i' mit 'n Ross, mit'n Fritz'l z'saum'.
Mit 'n G'schirr und Bauchgurt au'zog'n,
so woa' a' ei'g'schirrt fia' Ar'n, Pfluag oda' Wog'n.
Und so faung' i' des Rossfoah'n au',
wo da' Papa g'sogt hot: "Hans'l, des kaunst d' schau'!"
I' woa' zwoa' nia a Rossknecht,
owa' fia' d' Not woa' i' a' schau' recht.
Da Obschiad van Fritz, dea' woa' schau' schwa',
wia da Ross-Staund daun woa' schau' la'!

Zusatzinfos

• es wird goa' = es wird gar, es nimmt ein Ende, es wird fertig
• Oa'spa'l = Einspann, hält die Seilstränge vom Geschirr zum Zug am Wagen
• Zaug = Gespann (von Pferd, Ochs, Kuh gezogen)
• Loatseu' = Leitseil
• Kiss = Polster aus Leinen, der mit Rosshaaren gefüllt war, vom Zugtier unter dem Kummet getragen

Quellen

Hans Pichler, Hofedl