Fadl-Fadlschneida
Oda: "De söwa g'fuarate Sau!"
Aus der Zeit, als noch ein jeder Bauer und Kleinhäusler ein Schwein fütterte!
Friaha hot boi a jed's Bau'nhaus a Fad'lsau g'hobt
und zwoa dass oana net aune Fad'l tobt.
Weu oa' Sau hot a jeda Kloaheisla' se g'hoit'n,
a Fleisch hot a jeda braucht voa oill'n.
Hot de Fad'lsau 'bä'at sodaun,
daun is' d' Saukist'n kemma draun.
Mit an Wog'n oda Mistschlitt'n
geht's mit da Zaug und Sau dahi'n.
Ei'g'sperrt woa de Sau do drin,
und daun geht 's mit 'n Ross oda Tracktoa dahi',
zan next'n Saubäa'n in da Näh',
dea wiad va da Gemeinde g'hoit'n jo eh'.
Da Saubäa'nhoita kriagt a Fuadagö'd,
dass a a wen'g wos va den Saubäa'n hätt'.
Woa de Sau daun 'deckt,
daun is' ma hoam g'foan aum schnölls'tn Weg.
In zirka via Monat daun
kemman de kloan Fad'l aun,
woan s' daun sechs Wochan oi't,
braucht ma in Sauschneida boid.
Es is' daun schau Zeit,
dass ma de kloan Saubä'an schneid't.
Er wiad mit oan Wort entmannt,
dass a bessa zuanehma der Schwei'za kaunn.
Da Fad'lschneida woa aus da Nochb'schoft,
dea des hoit schau öfta g'mocht,
zan schneid'n hot ma an sauban Fiafleck g'numma,
den hot a se bund' daun uma,
mit an schweinan Schmoi'z do hot ma g'schmiat,
dass jo nix schwiarat wia'd.
G'mua woan a poa kloane Schnitt',
mea woa da Eingriff' nit,
Kriagt haum s' daun de frische Howanstrei,
dass jo nix kau' sei'.
A Zicht'l hot se ois daspoat,
nua fia d' Schwei'za, do woa 's hoat.
Owa es hot jo nua an kloan Brenna tau,
und da Schwei'za is schau wida davau!
Zusatzinfos
- Fad'lsau = Mutterschwein
- bäarat = brünftig, zur Aufnahme bereit [willig]
- Saukist'n = Transportkiste für Schweine, ca 2m lang X 0,6 m breit und 1 Meter hoch
- Roß = Pferd
- Saubäar = männliches Schwein
- Saubaär'nhoida = Halter des Ebers
- Fuadagöd = Futtergeld für Eberhalter
- Fad'l = Ferkel
- Sauschneida = jemand, der die jungen Eber kastriert [Fad'lschneida]
- Schwei'za' = beschnittener Eber
- Fiafleck = Arbeitskleidung (Überwurf mit Latz)
- Schmoiz = Schweineschmalz
- schwiarat = entzündet (von Schwäre / Geschwür)
- nix kau' sei' = keine Vorkommnisse
- Zicht'l = zur Zucht verwendbares weibliches Ferkel
Quellen
Hans Pichler, Hofedl
