Ei'liadan
G´schichtl
In 1992zga Johr homa zum Wochenende bei meine Eltern g'wohnt. Mir san olle Wochenenden noch Wien hin und her gependelt und in St. Oswald homa Haus baut.
Somstog wonn wir woch woadn san, hom meine Eltern scho ei'gliadad. Mei Vota hot den Luadawogn mit da Hond auf de Wiesn zogn. In der Fruah hot a mit da Sengst des Gros o'gmat. De Sengst hot nämli besser gschnitt'n waun da Tau nu g'legn is. Mei Mama hot zsamgrecht und da Vota hot donn mit da Gobi des Gros am Luadawagn aufigebm.
Wonn unser Sohn Thomas mit seine 4 Johr des g'hert hot, dass da Opa mit da Sengst maht, is a im Gittabett aufgsprunga und hot gsogt: „Da Opa tuat scho sensen, i muas zan Opa!“.
Mei Bruada hot donn den Luadawogn mitn Traktor obas Haus aufigfiat. Va duat is des Gros duach de Fuataluka obi g'schmissn woan. Wia ma nu koan Traktor ghobt hom, is des mitn Roß erledigt woan.
Des Gros woar net so vü, weil de 6 Kiah hom donn an Silo a nu dazua kriagt. Des Luada hot ma olle Tog frisch für de Kiah gmad. Wia ma sie vorstelln konn, hom se de Kiah drüber hergmocht. Natirli hom se net nur de Kiah z'Mittag g'freit, wei a für mein Sohn Thomas wo des da beste Start in den Tog :-).
Zusatz-Info
| Luada | frisch gemähtes Gras |
| Sengst | Sense |
| Kiah | Kühe |
| gmad | gemäht |
| Gobi | Heugabel |
Quellen
Johanna Hinterndorfer, St. Oswald
