Ei'gschiern
Da kloane Rossknecht!
Es woa amoi in Yschpatoi a kloa's Leit,
ois Rossknecht hot a sei' größte Freid,
so wiad er va de aundan Rossknecht oiweu sekkiert,
weu er üwa d' Ross net drüwa siacht.
Se sog'n s', ea muaß friaha aufsteh, daweu d' Ross' nu lingan,
weu er net auf d' Ross tuat auffi glenga kinna.
Owa waun er a kloa, owa er woa wif
und hot seine Ross im Griff.
So woas a waun as auf d' Stoi'kred'n g'füat
und de Ross hot nu koa Rossg'schier ziert,
a schneidig's Wort van Knecht
und da Kopf woa herunt, wias passt hot recht.
er hot eahm des Kiss daun auffi tau,
des Ross mit'n Kopf an Deita und es woa drau,
des söwi is a mit'n Kummat g'scheg'n
und mia hot's schau aum Hois oman g'seg'n.
Den Üwatau hot ma mit Schwung driwa geb'n
und mit an Vort'l a wenig g'ruckt und schau is a g'leg'n.
Den Bauchgurt zaumzog'n, dass a net rutscht und guat hoit,
de Loatseu' zaumgroit auf's Kummat, dass net owa foit.
'S Oa'spa'll aum Straung aug'hengt
und umadraht und aum Kummathog'n mit'n Oaspa'llaug'n eig'hengt.
Ois nextas hot a des Biss ei'glegt
und des Ross is ei'gschiert g'west.
Ea hengt des Ross daun au',
daweu des zweite Ross woa drau.
Is' owa des erschte Ross unruahi' woan
hot ea an Knecht zan hoit'n braucht bis zan foa'n.
Daun hot a d' Ross triebm zan Loatawog'n,
owa wia 's weita gaunga is', mecht' i' eich des nexte Moi sog'n!
Quellen
Erzählt von Johann Schauer [Lepoitn Hans], aufgeschrieben und zusammengestellt Hans Pichler, Hofedl
Zusatzinfo
- Stoi'kreden = überdachter Vorplatz des Stalles
- Kiss = Weiche Unterlage des Kummat
- Deita = Deuter - eine andeutende Bewegung
- Kummat = Hauptgeschirr für den Zug [Einspann]
- Loatseu' = Leitseil zum Lenken der Pferde
- Vort'l = besonderes Können einer Arbeit, handwerkliches Geschick, Trick, vorteilhafte Technik
