Earl stecha
A so a Dia'nd'l mit via', fünf Joah'
schaut, wos do glitzert unta' da' Miaz'l ihre Hoa'.
Des Dia'nd'l pitz'lt und reat,
weu' ihr nu' koa' Ohrring'l g'hea't.
So gengan s' daun zan Uhrmocha' hoi't,
weu' de Oma g'sogt hot, dass s' es zoih't.
De Frau Uhrmocherin schaut se' de Ohrwasch'l au',
do hot des Dia'nd'l a wen'g a Aungst daun schau'.
Es kimmt daun: "Mit wos wia'd 's g'mocht?"
"Mit Ohrstecha', Nod'l oda' mit ana Oih'n hoi't g'rod'."
Desinfiziert mit Schnops, hoaß'n Wossa' oda' Flaumme -
den Dia'nd'l is hiatzt gaunz baunge.
Bis des Eahrl-Stecha' daun is' um,
koane Ohrring'l, des woa' iah' jo z' dumm.
Bis zan next'n Kiar'ta' wia'd iah' va'sprocha',
daun da' ma de Ohrring'l einimocha.
Hiatzt hoaßt 's aufpass'n, dass 's net schwiarat wia'd,
dass jo koa' Entzündung in Oah'wasch'l kriagt.
Wo sand de Zeit'n, wo Ohrring'l a Mädchenwunsch woa'?
Hiatzt is' da' Wunsch a Handy, und 's Ohrring'lstecha', des is' goa'!
Zusatzinfos
- Eahr'l = Ohr
- Dia'nd'l = Dirndl, Mädchen
- Hoa' = Haare
- pitzelt = ist jähzornig
- g'hea't = gehört
- hoit = halt, eben, dennoch
- zoih't = Zahlt
- g'mocht = gemacht
- Oih'n = Ahle
- baunge = bange
- z' dumm = zu dumm
- Kiar'ta' = Kirchtag, Kirtag
- Ohrring'l einimocha = Ohrringe einhängen
- schwiarat = schwärend, entzündet
- goa' = gar, zu Ende
Quellen
Hans Pichler, Hofedl