Dö Kraumpate Woidbeirin

Weit hinta Gaming
aum Berg drob'n is' g'scheg'n.
Haum s' meass'n in Woidbau'n
gaunz spot nu' vaseg'n!

Da Mesna wia a da Pforra,
hau'm oi' zwoa recht g'schwitzt,
weu' da Berg is do auffi
wia a Zuckahuat g'spitzt!

Oft san' s' nochher olle zwoa hoam,
um a weng'l noch Eu'fi umadum.
Da Wind hot schau' pfiffa,
auf de Berg'n rundumatum!

In Woidbau'n sei Söl',
woa' schau roglat in' Leib'.
Da Wind muass si s' g'hoit hom,
weu' tot find't 'n 's Weib!

In da Friah woin s' daun hoi't owi,
weg'n da Tot'nb'schau beizeit',
do' es kau' neam't meah' owi,
es is ollas schau' gaunz zuag'schneibt!

Bis iwa d' Fensta
hot de Schneeg'wa'n schau' g'laungt,
is' neam't in da Hitt'n,
den 's ums Owigeih' plaungt!

Und weida hot 's g'schneibt,
wos van Hümmi' hot meg'n,
host nix meah' g'seg'n heit,
va de Hitt'n und Weg'n!

Bocksteif woa' dea' Tote -
"Wos soi' ma denn tuan?"
Nau sogt de Böu'rin,
"Legt 's 'n owi auf d' Rua'm"!

Drei Wocha is a g'leg'n,
daun hot sa se' g'wend't,
daun hot ma do' wieda
in Weg van Berg owi dakennt!

Da Dokta is kemma,
"Wo is den da Bau'?"
"Geh owi in Kölla,"
sogt d' Bäurin, "und schau!"

"Doat wia'st d' 'n schau' find'n
aum Fuada fia' d' Sau."
I' leicht' üwa' d' Stoffel'n,
sunst foi'st ma aum Bau'!"

Daun stoi'pert s' mit 'n Leuchta
'in Dokta vorau':
"Do liegt a, da Hoschpe',
mei' kreizbrava Mau'!"

Wa' eh nu net gnädi' g'we'n,
Mist soi't ma fiah'n,
und 's Hoi'z muass nu' owa,
do muass a krepiern!"

Laung steht hiatzt da Dokta,
ban Tot'n hiebei,
daun sogt a voi' Mitleid
zan kraumpat'n Wei':

"Dea' Oa'me muass g'litt'n hob'n,
des kennt ma eahm au',
ea hot 's üwastaunt'n,
dea seel'nguate Mau'!"

"Ah, g'stoa'm is a leicht,"
sogt de Bäurin daneb'n,
Auf d' Stoh nu an Schnauffa
und hi' is a g'wen!"

"Na heast d'," sogt da Dokta,
"des is jo do g'wiss,
vü' g'litt'n hot a, weu' do'
sei' G'sicht vazog'n is'!"

"Schaut 's hea' aum Mund do,
dea hängt jo hinob.
Da Woidbau' stieg schmerzli',
hinunta ins Grob!"

"Ha," locht hiatzt de Bäurin,
"des kimmt net van Tod!
Hob olle Tog de Ruam g'hoit
und woa in da Not!

Wohi' dann mit 'n Leuchta?
Hob sunst nix daglengt.
Do hob i' 'n hoit a jed'smoi'
in d' Dreasch'n eam g'hengt!"

Zusatzinfos

• kraumpat = gefühllos
• vaseg'n = mit der letzte Ölung (Sterbesakramente) versehen
• Eu'fi = Elf Uhr
• roglat = nicht gut beisammen
• Woidbau' = Waldbauer
• owi = hinunter
• meg'n = möchten
• d' Ruam = die Rüben
• Bau' = Bauch
• Hoschpe = nicht mehr gelenkige Person
• Stoh = Milchrahmsuppe
• Dreasch'n = verzogenes Gesicht

Quellen

Gesammeltes Gedicht

aufgeschrieben von Hans Pichler, Hofedl