Do hätterstas Sche'

Da Hans'l is' a brava' Bua',
und recht g'scheit is' a' a' dazua,
d'rum tan 'n olle buserier'n,
ea' muass auf wos studier'n.
D' Muatta' hätt' hoi't so vü' gern,
tat' da' Bua' a Pfoarra' werd'n.
"Hans'l", sogt s', "do hätt'st d' as sche',
olle Tog in d' Kircha' geh',
olle Wocha' a poa' Ho'zatmess'n
und olleweu' des guate Ess'n,
weil mit 'n Fost'n, Hans'l schau,
is' 's a' heit' nimma so genau,
kau'st d' a guate Köchin nehma',
hätt'st bestimmt a guat's Weiterkemma'."
Do' da' Bua' wü' des nit hear'n,
der sogt: "I' mecht' a Maurer werd'n!"
"Hans'l", sogt de Muatter, "loss 's,
do wia'st d' drecki', do wia'st d' noss,
oi's Geistlicha', do hätt'st as sche',
kunnt'st oi'weu' in schen' G'waund umgeh'."
Do tuat da' Hans'l recht laung denka'
und daun losst ea' des Köpfi' hänga'.
Dabei tuat 's eahm außa'wusch'n:
"Va'dienst jo nix, kau'st jo net pfusch'n!"

Zusatzinfos

• buserier'n = nötigen, drängen
• Ho'zatmess'n = Hochzeitmessen
• Weiterkemma' = Auskommen
• G'waund = Gewand, Kleidung
• außa'wusch'n = (die ehrliche Meinung) herausgerutscht, entwichen, entwischt

Quellen

Hans Pichler, Hofedl